Қосимовлардан Шомуродовларгача. Ўзбек футболидаги сулолалар ҳақида

Жаҳон футболида кўплаб машҳур ота-бола ва ака-ука ўйинчиларни учратиш мумкин. Ушбу оилаларда футбол худди бошқа соҳалар билан бўлгани каби авлоддан авлодга ўтиб келади. Бунга мисол тариқасида Мальдинилар, де Бурлар, Ҳоландлар, Азарлар, Эрнандеслар каби юлдуз даражасидаги футболчилар сулолаларини келтириш мумкин. Хўш, ўзбек футболида ҳам шундай футболчилар борми ва улар профессионал фаолияти давомида қай даражадаги муваффақиятларга эриша олган. Қуйида ана шу саволларга жавоб олиш мумкин бўлади.

Абдураимовлар

Рўйхатимизни ўзбек футболида ўз ўрнига эга бўлган сулола вакиллари Абдураимовлар очиб беради. Узоқ йиллар давомида «Пахтакор» таркибида ёрқин ўйин кўрсатган Биродар Абдураимовнинг уч нафар ўғли — Азамат, Жасур ва Баҳодир Абдураимовлар отасининг касбини давом эттиради.

Азамат Абдураимов Ўзбекистон терма жамоаси ва «Пахтакор»даги ўйинлари орқали яхши танилган. Жасур Абдураимов ҳам «Пахтакор» сафида тўп сурган бўлса, Баҳодир Абдураимов «Дўстлик», «Сурхон», «Динамо» каби клубларда фаолият юритган.

78 ёшли Биродар Абдураимов ҳозирда нафақада. Мураббийлик фаолиятини давом эттираётган Азамат июль ойида Про-Лигада иштирок этадиган «Янгиер Қурувчи» клубидан истеъфога чиққан. Жасур Абдураимов Бекободнинг «Металлург»ига устозлик қилаётган бўлса, Баҳодир Абдураимов бутсиларини михга илгач, мураббий сифатида Про-Лига ёки Суперлига даражасидаги клубларда фаолият юритмаган.

Қосимовлар

«Ўзбек Марадонаси» Миржалол Қосимовнинг мамлакат футболи ва унинг терма жамоасида тутган ўрни ҳақида ортиқча гапиришнинг ҳожати йўқ. Клублар даражасида «Пахтакор» ва «Алания» сафида катта ютуқларга эришган Қосимовнинг икки ўғли ҳам ўз изидан борган.

Миржалол Қосимовнинг катта фарзанди Миркамол ёшлигида футбол билан шуғулланган, бироқ жароҳати сабаб мураббийлик фаолиятини нисбатан эртароқ бошлашга мажбур бўлади. Ҳозирда у «Бунёдкор» академиясида ёш футболчиларга устозлик қилмоқда. Қосимовларнинг кичик вакили Миржамол эса отаси мураббийлигидаги «ОКМК» клуби шарафини ҳимоя қилмоқда, бунгача у «Бунёдкор»да ҳаракат қилган.

2010 йиллар ўзбек футболида ака-ука Тожиевлар ўзининг энг юқори чўққисига чиққан давр бўлиб тарихга кирган. Ҳужумчилар Зайниддин ва Фарҳод олдинги чизиқлардаги ҳаракатлари орқали яхши натижаларга эришган бўлса, Камолиддин мудофаада ишончли ўйин кўрсатарди. Ўша пайтларда «Пахтакор»ни Тожиевларсиз тасаввур қилиш қийин эди.

Зайниддин Тожиев ҳозирда «Одил Junior» академиясида фаолият юритмоқда. Камолиддин «Металлург»да тўп сураётган бўлса, Тожиевларнинг кенжаси Фарҳод 2019 йилда фаолиятини якунлаган, унинг сўнгги клуби «Сурхон» бўлди.

Кападзелар

Узоқ йиллар Ўзбекистон терма жамоаси, «Бунёдкор», «Пахтакор» ва бир қатор хориж клублари сафида барқарор ўйин кўрсатиб келган Темур Кападзенинг отаси Тоҳир Кападзе ҳам ўз вақтида футболчи ва мураббий сифатида фаолият юритган. Ҳозирда нафақада бўлган Тоҳир Кападзенинг мураббийлик резюмесида «Автомобилчи», «Цементчи», Ўзбекистон олимпия терма жамоаси, «Нефтчи» каби бир қатор жамоаларни учратиш мумкин. Темур эса айни дамда Про-Лигада иштирок этаётган «Олимпик» жамоасига устозлик қилмоқда.

Шацкихлар

Ўзбек футболида ўз ўрнига эга бўлган яна бир сулола вакиллари Олег ва Максим Шацкихдир. Олег Шацких 1992—2003 йилларда «Пахтакор», «Навбаҳор» ва «Дўстлик» каби жамоаларда тўп сурган. Максим Шацких эса «Динамо Киев» ва Ўзбекистон терма жамоасидаги ҳаракатлари билан футбол мухлисларининг қалбидан чуқур жой олган.

Аҳмедовлар

Ўзбекистоннинг сўнгги ўн йилликдаги энг яхши футболчиси Одил Аҳмедовнинг укаси Азим Аҳмедов ҳам акасининг ортидан бориб, миллионлар ўйинида фаолият юритиб келмоқда.

Одил фаолияти давомида «Пахтакор», «Анжи», «Краснодар», «Шанхай СИПГ» каби клубларда тўп сурган. Ҳозирда у «Цанчжоу Майти Лайонс» (Хитой) аъзоси ҳисобланади. Азимнинг меҳнат дафтарчасида эса ҳозирча иккита клуб бор: «Навбаҳор» ва «Пахтакор».

Денисовлар

Ўзбекистон терма жамоаси, «Днепр», «Локомотив» таркибидаги ишончли ва тезкор ўйини билан ном қозонган Виталий Денисовнинг отаси Генадий Денисов ҳам на ўйин бобида ва на машҳурлик борасида ўғлидан қолишган.

Денисовларнинг каттаси футболчи сифатида «Пахтакор», «Навбаҳор» клублари ва Ўзбекистон миллий жамоасида тўп сурган. Виталий эса ҳозирда Россиянинг қуйи лигасида иштирок этадиган «Балтика»да тўп тепмоқда.

Ашурматовлар

Ўзбекистон терма жамоаси, «Пахтакор» МҲСК ва «Бунёдкор» каби жамоаларда тўп сурган Ашурматовлар сулоласининг илк вакили Бахтиёр Ашурматов ҳозирда «Қўқон-1912» жамоасини бошқармоқда. Унинг жияни Рустам Ашурматов ҳам тоғасининг касбини давом эттирган. Бахтиёр Ашурматов сингари ҳимоя чизиғида ҳаракат қиладиган Рустам айни пайтда Жанубий Кореянинг «Канвон»ида тўп тепмоқда, бунгача у «Бунёдкор» шарафини ҳимоя қилган.

Рашидовлар

Тожиевлардан кейин ўзбек ака-укалар триоси эстафетасини Рашидовлар ўз қўлига олади. Уларнинг тўнғичи — Сардор Рашидов Ўзбекистонда «Бунёдкор», «Локомотив» ва «Пахтакор» сафида ҳаракат қилган. Легионер сифатида эса Сардор «Ал-Жаиш» (Қатар), «Ал-Жазира» (БАА), «Насионал» (Португалия) «Қатар СК» (Қатар) жамоалар шарафини ҳимоя қилган. Ҳозирда у Кувайтнинг «Ал-Кувайт» клубида тўп тепмоқда.

Рашидовларнинг ўртанчаси Санжар «Бунёдкор» сафида ҳаракат қилаётган бўлса, кенжа вакил Саҳоб «Сўғдиёна»да тўп сурмоқда.

Шомуродовлар

2010 йилларда «Насаф» сафидаги ўйинлари ва гол сезиш қобилияти орқали ном қозонган Илҳом Шомуродовнинг жияни Элдор Шомуродов орадан 10 йил ўтиб, «Рома» сафида тўп сурмоқда.

Илҳом Шомуродов «Насаф»гача «Сурхон», «Тўпаланг» ва «Машъал»да тўп сурган. Элдорнинг резюмесида эса «Машъал», «Бунёдкор», «Ростов» ва «Женоа»ни учратиш мумкин.

Элдор Шомуродов интервьюларида ҳар доим ўзининг катта ютуқларга эришишида амакиси Илҳом Шомуродовнинг ўрни катта эканлигини таъкидлаб келади.

Рўйхатимиздаги энг ёш ака-ука футболчилар — Ҳожиакбар ва Жавоҳир Алижоновлар. Алижоновларнинг каттаси Ҳожиакбар анча йиллардан бери терма жамоалар ва «Пахтакор»да ёрқин ўйин кўрсатиб келмоқда. Унинг укаси Жавоҳир Алижонов эса 2020 йилдан бери Тошкентнинг «Локомотив» клуби шарафини ҳимоя қилади.