Тошкентда дунёнинг турли мамлакатларидан келган ўзбекистонликлар иштирокида халқаро форум ўтказилди

Тошкентда 26 сентябрь куни дунёнинг турли мамлакатларидан келган ўзбекистонликлар, ишбилармон доиралар вакиллари, дипломатлар ва турли соҳа мутахассислари иштирокида “Ўзбекистонлик.Тошкент” IV халқаро форуми бўлиб ўтди.

“Ўзбекистонлик” форумларининг мақсади — бутун дунё бўйлаб ёйилган ўзбекистонликлар ўртасида глобал нетворкингни йўлга қўйиш ва Ўзбекистонни интеллектуал, истеъдодли ва меҳнаткаш инсонлар мамлакати сифатида тараннум этиш. Uzbekistan’s club ижодий жамоаси томонидан ташкил этиладиган халқаро “Ўзбекистонлик” форумлари аввалроқ Берлин (Германия), Париж (Франция) ва Лондон (Англия) шаҳарларида муваффақият билан бўлиб ўтган эди. 

Тадбирнинг энг муҳим воқеаларидан бири — илк бор тақдим этилган “Олтин Чинор” миллий мукофоти бўлди. Бу мукофот ижтимоий масъулият соҳасидаги етакчи компанияларни рағбатлантириш мақсадида таъсис этилган бўлиб, унга энг илғор ижтимоий лойиҳаларни амалга оширган корхоналар лойиқ кўрилди. “Олтин Чинор—2024” мукофоти Агробанк, TBC Bank, Korzinka.uz, СҚБ, Kapitalbank, Uzum ва Payme экотизимларига топширилди.

Форумга ташриф буюрганлар Uzbekistan’s club номли журналнинг иккинчи сони билан ҳам танишиш имкониятига эга бўлди. Замонавий ва ўзига хос услубга эга ушбу журнал трендларни бошлаб бериш учун яратилган. Унинг вазифаси — замонавий ўзбекистонликнинг янги қиёфасига намуна бўлаётган шахслар ва уларнинг образларини тарғиб қилиш. 

Журнал саҳифаларидан Қаҳрамон Қуронбоев, болалар омбудсмани Сурайё Раҳмонова, элчилар Фурқат Сиддиқов ва Жонатан Ҳеник, спортчилардан Оксана Чусовитина ва Тимур Кападзе, таниқли иқтисодчи Отабек Бакиров ва бошқа номдор ўзбекистонликлар билан интервьюлар ўрин олган.

Uzbekistan’s club журнали ва Прогрессив ислоҳотлар маркази ташаббуси билан Ўзбекистон тарихида илк марта ўзбек олимларининг топ-10 талиги эълон қилинди. Рўйхат халқаро рейтинглар, оммавий ахборот воситаларидаги чиқишлар ва бошқа кўрсаткичлар асосида тузилган.