Қирол Абдулла ва қиролича Раниянинг тўнғич ўғли шаҳзода Ҳусайн оила қурди. Унинг танлангани Ражва исмли ёқимтой қиз эди. У иккинчи Кейт Миддлтон деб аталади ва қайнонаси билан солиштирилади. Қуйида Иорданиянинг бўлажак қироличаси Ражва Ал Саиф ҳақида маълумот берилади.
Икки халқ ва икки давлат иттифоқи
2023 йил ёзининг биринчи куни Иордания қироллик оиласи учун муҳим воқеа бўлди – Абдулла ва Раниянинг тўнғич ўғли Ҳусайн бўйдоқлик билан хайрлашиб, турмуш қурди. Унинг рафиқаси Саудия Арабистонидан бўлган Ражва Ал-Саиф исмли гўзал қиз эди.
Валиаҳд шаҳзода Ҳусайннинг тўйи нафақат йилнинг, балки бутун ўн йилликнинг муҳим воқеаси эди. Маросим кўлами бўйича шаҳзода Уилям ва Кейт Миддлтоннинг тўйи билан таққосланади. Уэлс шаҳзодаси ва маликанинг тўй маросими 2010 йиллардаги асосий маросимга айланган бўлса, Ҳусайн ва Ражванинг тўйи йигирманчи йилларнинг муҳим воқеаларидан бири бўлди.
Иордания қироллик оиласи бой тарих ва кучли анъаналарга эга. Бу Иордания жамиятининг бир қисми сифатида ниҳоятда муҳим ва жаҳон саҳнасида катта рол ўйнайди. Шунингдек, қирол оиласининг Ҳошимийлар сулоласидан келиб чиққан насл-насабга эга бўлиши ҳам муҳим, бу эса уни тарихий аҳамиятга эга қилади.
Ражва нафақат саудиялик бадавлат тадбиркорнинг оиласида вояга етган, балки онаси томондан унинг Саудия қироллик оиласи билан алоқаси бор. Саудия Арабистони ва Иорданиянинг халқаро муносабатларда бир оз қийинчиликларга дуч келганлиги сабабли, Ҳусайн ва Ражва иттифоқи ҳам сиёсий хусусиятга эга бўлиб, икки давлат ва қироллик уйлари ўртасидаги алоқани мустаҳкамлаши мумкинлиги кўзда тутилган.
Йил тўйи ва Иордания тарихидаги янги давр
Тўйнинг ҳашаматлилиги кўпчиликни ҳайратда қолдирди: мамлакатнинг бўлажак раҳбари турмуш қурди. Бутун мамлакат сарой аҳли билан бирга байрам қилди. Шу кун дам олиш куни деб эълон қилинди. Маросим жуфтлик мусулмон бўлса ҳам масжидда эмас, балки пойтахт Аммандаги Заҳран саройида бўлиб ўтди.
Анъанага кўра, келин-куёвлар қиличли арка остида юрди, мусиқа янгради ва ноғоралар гумбурлади.
Тўйга 1700 дан ортиқ меҳмонлар, жумладан, бутун дунёдан қироллик оилалари аъзолари таклиф қилинган. Улар орасида Буюк Британиянинг бўлажак қироли шаҳзода Уилям рафиқаси малика Кетрин, малика Беатрис ва унинг турмуш ўртоғи Эдоардо Мапелли-Моззи, Нидерландиянинг қироллик жуфтлиги Виллем-Александр ва Максима, Испаниянинг собиқ қироли Хуан Карлос 1 гўзал рафиқаси София, Швеция валиаҳд маликаси Виктория ва шаҳзода Даниэль, валиаҳд шаҳзода Фредерик, Бельгия қироли Филипп қизи Элизабет ва бошқалар бор эди.
Келин ўз гўзаллиги билан маросимга ташриф буюрган қироллик маликаларидан ажралиб турган. Бир қарашда унинг бўлажак қиролича эканини тушуниб олиш мумкин эди. Шаҳзода севгилисидан кўзини узмаган, бир зумда барча шубҳалар йўқолган ва жуфтлик ўртасида ҳақиқий муҳаббат борлиги маълум бўлган.
Муҳокамаларнинг асосий мавзуси Ражванинг либоси эди. Жуфтлик 2 хил кийимда кўриниш берган.
Кўпчилик жуфтликдан мусулмон маданиятини акс эттирадиган анъанавий либосларни кутишган. Бироқ Ражва замонавийлик ва исломий унсурларни моҳирона уйғунлаштирган ҳолда Ғарб услубига таянишга қарор қилди.
Тўй маросими учун бўлажак қиролнинг рафиқаси жуда ғайриоддий моделни танлади. У дунёга машҳур ливанлик дизайнер Элиэ Саабнинг фил суяги рангидаги либосини кийган. Бу дизайнерни аристократлар ва машҳурлар жуда ҳурмат қилади.
Иорданиянинг навбатдаги маликаси консорти учун дизайнер бегуноҳлик ва ҳозирги тенденцияларни бирлаштирган жуда ноодатий кўриниш яратди.
Узун енгли кўйлакнинг кесими ассиметрик бўлиб, у бир елкага қистирилиб, бел қисмига йиғилган.
Либос ҳашаматли, жуда мос келадиган шаффоф тўр, тиара ва олмос билан безатилган. Келиннинг сочи жуда оддий, ҳеч қандай турмакларсиз йиғиштирилган.
Келинни куёвнинг укаси шаҳзода Ҳашем манзилга олиб борди ва томошабинларнинг эътиборини ўзига тортди.
Ражванинг Ал-Ҳусайния саройидаги зиёфатда кийган иккинчи либоси — Dolce & Gabbana’га тегишли эди. Кийим катта ҳажмли кашталар ва қисқа енглар билан безатилган ва образ қўлқоплар билан тўлдирилган.
Иорданиянинг бўлажак ҳукмдорлари Ҳусайн ва Ражванинг тўйидан сўнг бутун дунё оммавий ахборот воситалари “Шаҳзода архитекторга уйланди” сарлавҳалари остидаги хабарлар билан тўлди. Унинг ҳаёти Золушканикига умуман ўхшамаган.
Оиладаги энг кенжа фарзанд
Ражва Ал-Саиф 1994 йилнинг 28 апрелида Саудия Арабистони пойтахтида туғилган. Унинг оиласида беш нафар фарзанд бор, Ражва энг кичиги. Маликанинг иккита акаси бор.
Иорданиялик малика Ражва оддий оиладан чиққан содда қиз деган гапларнинг барчаси ёлғон. У бадавлат оилада вояга етган: маликанинг отаси катта бизнесмен, йирик корпорация раҳбари, унинг фаолияти тиббиёт ва қурилиш соҳаларини ўз ичига олади.
Ражванинг отаси ҳам аристократлардан, унинг аждодлари орасида Судейрадаги Ал-Аттор шаҳридан бўлган шайхлар бор. Бўлажак қироличанинг онаси ҳам аристократ, Саудия Арабистонининг ҳозирги қироли Салмон бин Абдулазиз Ол Сауд унинг амакиси.
Нафақат чиройли, балки жуда ақлли
Бой оилаларда бўлганидек, бўлажак малика оиласида болаларни тарбиялашга катта эътибор берилди. Шунинг учун Ражва жуда яхши университетларда ўқиди. У дастлаб Сиракуза университетида архитектура бўйича бакалавр даражасини олди.
У кейинчалик Лос-Анжелесдаги мода институтида визуал коммуникациялар бўйича таҳсил олди.
Малика институтни тугатганидан сўнг, АҚШда қолди ва Паттерн архитектура компаниясида асосий мутахассислиги бўйича ишлади. Бироқ бир мунча вақт ўтгач, у Американи тарк этишга қарор қилди ва Саудия Арабистонига қайтиб келиб, дизайн студиясига ишга кирди.
Кўзга ташланадиган қиз
Мусулмон мамлакатларидаги қизларга болаликдан вазминлик сингдирилади. Ражва ҳеч қачон ҳеч қандай шубҳали воқеаларнинг иштирокчисига айланмаган, ижтимоий тармоқларда маликанинг бирор-бир провокацион фотосуратини топиб бўлмайди, унинг исми ҳеч қандай можароларда келтирилмаган. Бироқ бу унинг кўзга ташланмайдиган қиз эканини англатмайди.
Маликанинг курсдошлари унинг ҳар доим бошқалардан ажралиб турганини эслашади. Масалан, у битирув маросимида кумушранг кроссовка кийган. У ўз оёқ кийимини битирув либоси билан бирлаштиришга қарор қилган ва бошқа талабаларнинг ҳеч бири бундай қилмаган. Суратда эса малика Ражва бошқалардан ажралиб турганини кўриш мумкин.
Полиглот
Ражва — ақлли ва билимли қиз. Бунинг яна бир исботи сифатида маликанинг бир нечта тилларда эркин сўзлаша олишини айтиш мумкин. Ражва она тили араб тилидан ташқари, француз ва инглиз тилларини яхши билади.
Спортчи
Ўша пайтда унинг бўлажак қариндошлари бўлажак қиролича Ражванинг нимага қизиқиши ҳақида жамоатчиликка айтиб беришди.
Ражванинг қайнонаси қиролича Рания маликани учинчи қизи сифатида қабул қилди. Уларнинг ўртасидаги муносабатлар яхши эканини суратлардан ҳам билиб олиш мумкин.
Айнан ўша пайтда қироллик уйи Ражванинг от билан тушган суратини ижтимоий тармоққа жойлаштирди. Бундан билиб олиш мумкинки, бўлажак қиролича от минишни яхши кўради.
Малика расм чизишни ва қўлда санъат асарларини яратиш билан шуғулланишни ҳам яхши кўради. Бу севимли машғулотлар уни деярли мукаммал қилади.
Шаҳзода билан учрашув
Ҳусайн ва Ражванинг севги тарихини сўзлаб бераётганда, уларнинг қандай учрашганликларини эътибордан четда қолдириб бўлмайди. Журналистлар эса бу нуқтани аниқлаш учун жуда кўп ҳаракат қилди.
Аввалига оммавий ахборот воситаларида АҚШда ўқиш пайтида бўлиши мумкин бўлган танишувлар ҳақида ёзилди. Бироқ Ҳусайн Калифорнияда эмас, Вашингтонда, Жоржтаунда ўқиган.
Ҳусайн ёшлигидан тахт вориси бўлишга тайёрланиб, давлат ишларида фаол қатнаша бошлаган. У 2015 йилда БМТ Хавфсизлик Кенгаши сессиясига раислик қилган энг ёш инсонга айланди. Орадан икки йил ўтгач, у БМТ Бош Ассамблеяси олдида нутқ сўзлади, бироқ жуфтликнинг БМТда учрашгани даргумон.
Шунингдек, улар жуфтликни ота-оналари таништирганини ёзишди, бироқ бу вариант расман тасдиқланмаган.
Бир боқишдаги муҳаббат ҳикояси эмас
Иорданиялик журналистларнинг ёзишича, биринчи учрашувда Ҳусайн ва Ражва ўртасида учқун пайдо бўлмаган. Улар учрашишди, гаплашишди ва фақат ўзларининг йўлларидан боришди. Жуфтлик бир-бирини эсламади ва ҳар бири ўз ҳаётини алоҳида ўтказди.
Бироқ кунларнинг бирида Ҳусайн бадавлат оиладан чиққан нафис қизни учратганини эслади, у бошқалардан ажралиб туришга муваффақ бўлди. У малика билан кўришди. Бу уларнинг ҳикоясининг бошланиши эди.
Изоҳ (0)