Болливуд оламида ўз ўрнига эга бир неча машҳур сулолалар бор. Улар орасида Рошанлардан мусиқачи ва актёр авлодлар етишиб чиқмоқда. Bollywoodtime нашри Рошанлар сулоласи ҳақида қизиқарли маълумотлар билан бўлишди.
Рошанлар сулоласи 4 авлоддан иборат. Ушбу ажойиб санъаткорлар сулоласининг аждоди — Рошан Лал Награтх Мохан. Рошан, Болливуд юлдузи Ритик ва унинг отаси Ракешнинг фамилияси эмас. Ушбу оиланинг барча аъзоларининг ҳақиқий фамилияси Награтх, Рошан эса Ритикнинг бобосининг исми бўлиб, у 1948 йилда Мумбайга кино соҳасида фаолиятини бошлаш учун келган.
Рошан Лал Награтх 1917 йил 14 июлда Гужранвалада (ҳозирги Покистон) жуда зиёли ва ўқимишли оилада туғилган. Болалигидан мусиқани ўрганган, турли чолғу асбобларини чалган. Мактабдан сўнг у Бутун Ҳиндистон радиосига ишга жойлашган ва 1940 йилларнинг охирида кино саноатида шон-шуҳрат ва даромадга эга бўлиш учун Бомбейга жўнаб кетган.
Унинг йўли жуда узоқ ва машаққатларга бой эди. Рошан орадан 10 йил ўтибгина машҳурликка эришди. 1960 йиллар унинг учун олтинга тенг давр бўлди. Унинг халқ ва мумтоз мусиқани уйғунлаштира олиши муваффақиятнинг сабаби эди. Рошан бир нечта мусиқий ҳитларни, жумладан Мадхубала ва Бхарат Бхушан билан машҳур «Ёмғирли тун» (1960) ни яратди.
Рошан икки марта оила қурди. Биринчи рафиқаси ҳақида кўп нарса маълум эмас, чунки никоҳ қисқа муддат давом этди. 1948 йилда у бенгаллик қўшиқчи ва бастакор Айра (Мойтре)га уйланди. У Болливуд фильмларида куйлаган, шу жумладан «Бебаҳо севги» фильмида Лата Мангешкар билан ҳам қўшиқ ижро этган. Афсуски, у турмуш ўртоғидан айрилгач, карьерасини тарк этишга мажбур бўлди. Рошан 1948 йилда юрак хуружидан тўсатдан вафот этди.
Рошан ва Айранинг икки ўғли — Ракеш ва Ражеш Рошан бўлиб, улар отасининг касбини давом эттирди. Ражеш ҳам мусиқа ўқитувчиси, Ракеш эса аввалига актёрлик соҳасида ўзини синаб кўрди, кейин эса режиссёрлик билан шуғулланди.
Ракеш оиланинг энг каттаси. У 1949 йил 6-сентябрда туғилган. Болалигидан у актёр бўлишни орзу қилар эди, лекин институтни тугатишга улгурмади, чунки у отасидан айрилиб, уйга қайтиб, онаси ва укасини боқиш учун ишлашга мажбур бўлди.
Ракеш шунга қарамай орзусини рўёбга чиқарди ва актёр бўлди, лекин у катта бу соҳада муваффақиятга эриша олмади, шунинг учун у режиссёрлик курсига ўтди ва бир нечта машҳур фильмларни суратга олди: «Қасос ўти», «Кишан ва Канхая», «Каран ва Аржун», «Криш» ва бошқалар.
Унинг укаси Ражеш Рошан Лал Награтх 1955 йил 24 майда туғилган. У мактабни тамомлашдан олдин ҳам Болливуд фильмлари учун мусиқа басталаган ва 20 ёшида «Жули» (1975) фильми учун энг яхши бастакор сифатида биринчи Filmfare мукофотини олган. 1987 йилдан бери Ражеш акасининг барча фильмларига мусиқа басталаган.
Тўғри, танқидчи ва томошабинлар Ракеш Рошанни плагиат учун ёқтирмайди, чунки у ҳар доим ўзининг энг машҳур куйларини бошқа мамлакатларнинг таниқли мусиқаларидан кўчиради.
Ражеш ва Ракешнинг иккитадан фарзанди бор. Ражеш рафиқаси Канчаннинг Ишан исмли ўғли ва Пашмина исмли қизи бор. Ракеш ва унинг рафиқаси Пинкининг Ритик исмли ўғли ва Сунейна исмли қизи бор.
Ишан актёрлик мактабини тамомлаган ва 2008 йилда Болливудда дебют қилмоқчи эди. Худди амакиваччаси Ритик каби Ишан ҳам яхши раққос. Аммо, Ишан актёрлик соҳасидан кетмади.
Унинг синглиси Пашмина ёш бўлса-да, аллақачон тажрибали театр актрисаси ва Жефф Голдбергнинг «Жиддий бўлишнинг аҳамияти» спектаклида рол ўйнаган. Театрга қизиқишидан ташқари, Пашмина Рошан Мумбайдаги Барри Жоннинг актёрлик мактабида олти ойлик курсни тамомлаган ва Болливуддаги дебютига ҳозирлик кўрмоқда.
Ўтган йили унинг амакиваччаси Ритик Instagram’даги постида у тез орада актриса бўлишини таъкидлаган эди: «Мен сен билан жуда фахрланаман Пашмина! Сен ўзгача руҳ ва ғайриоддий истеъдод эгасисан. Сенинг самимийлигинг атрофдаги ҳамма нарсани ёритади. Баъзида бу сеҳрни қаердан оласан деб ўйлайман ва бир оила эканлигимиз учун Худога шукур қиламан. Сенинг борлигингдан бахтиёрмиз ва ишончим комилки, тез орада бутун дунё ҳам шундай муносабатда бўлади», — деб ёзади у.
Ритик Рошан — Ракеш Рошаннинг ўғли. Бугунги кунда у Болливуддаги энг машҳур актёр ва раққосалардан бири. Албатта, отаси уни «Севишингни айт» муваффақиятли фильмида суратга олиб, Болливудга олиб кирди. Болливудда 20 йилдан ортиқ вақтдан бери бўлишига қарамай, Ритик муваффақиятли фильмларда суратга тушишда давом этмоқда.
Ритик актёр Санжай Хоннинг қизи Сюзанна Хонга уйланган эди. Жуфтликнинг 16 ёшли Rexан ва 14 ёшли Ридхон исмли икки ўғли бор. Йигитлар ҳали мактаб ўқувчиси, аммо келажакда улар ҳам актёр бўлишлари мумкин.
Афсуски, Ритик ва Сюзаннинг оиласи актёрнинг хиёнати туфайли бузилди. Ҳозирда у ёш актриса Саба Азад билан учрашмоқда.
Ритикнинг ягона синглиси Сунайна икки марта турмушга чиққан, аммо унинг иккиси ҳам ажрим билан якунланган. У биринчи марта 20 ёшида швейсариялик Ашиш Сони билан турмуш қурган. Унинг бу никоҳдан Сураника Сони исмли қизи бор. Ажримдан сўнг қиз отаси билан қолди ва онаси кейинчалик бизнесмен Мохан Нагарга турмушга чиқди. Афсуски, ушбу никоҳ ҳам узоқ давом этмади.
Ҳозир Сураника улғайиб, онасининг оиласи билан алоқада, бобоси ва бувисини зиёрат қилиш учун келади, амакиси Ритик билан ҳам муносабати яхши.
Сураника, Rexан ва Ридхон Рошан сулоласининг тўртинчи авлоди, аммо улар ўз ҳаётларини Болливуд билан боғлайдими ёки йўқми, буни вақт кўрсатади.
Айтганча, Ритик Рошаннинг собиқ рафиқаси Сюзанна ҳам яна бир машҳур ижодкорлар оиласи — ака-ука Санжай, Фероз, Зинат Аман, Фардин ва Заед Хан билан боғлиқ.
Изоҳ (0)