Гўзал ва назокатли Настенка ҳаммадан кўпроқ бахтли бўлиш ва севилишга ҳақли эди. Аммо ҳаёт Наталя Седихга кўп синовларни тайёрлаб қўйганди. Гарчи у машҳур актрисага айланган бўлса ҳам ҳаёти ўлим ёқасида қолди, шафқатсиз хиёнатга чидади ва кинодаги карьерасини тарк этишига тўғри келди. “Новий очаг” нашри актрисанинг муваффақиятга бой кўринса-да, аммо бошқаларникидан тамоман фарқ қиладиган тақдири ҳақида маълумот беради.
4 ёшидан бошлаб фигурали учишни ўрганди
Наташа ўз йўлини 4 ёшидаёқ танлаган: ўшанда у биринчи марта телевизорда фигурали учиш мусобақаларини кўрганди. Томоша қизни шунчалик ҳайратда қолдирдики, у, албатта, фигурали учувчи бўлишга қарор қилди. Унинг ота-онаси ҳам уни бу қарорда қўллаб-қувватлади. Фақат Наташани фигурали учиш бўлимига дарҳол қабул қилишмади: у жуда кичкина эди. Аммо у ўзини йўқотмади, жасорат билан залнинг ўртасига чиқди ва мураббий Татьяна Гранаткина учун ҳақиқий томоша уюштирди. Қизалоқ майдонни айланиб чиқди ва телевизор экранида кўрган ҳаракатларни такрорлашга уриниб, оёқлари билан пируэт ясади. Мураббий бундай қатъиятдан ҳайратда қолди ва таъсирланди, натижада Наташани қабул қилишди.
Балет танлови
Гранаткина Наташанинг рақс ҳаракатларини кўриб, фигурали учишда муваффақият қозонишини тушуниб етди ва унга “Болшой театр”нинг балет мактабига киришни маслаҳат берди. Катта рақобатга қарамай, Наташа мактабга қабул қилинди. Унга ҳаммаси ёқди, лекин бир куни унинг ҳам танлов қилишига тўғри келди: у бир вақтнинг ўзида ҳам балет билан шуғулланиб, ҳам Олимпия ўйинларида қатнаша олмасди. Натижада у балетни танлайди, чунки рақсга тушишни кўпроқ яхши кўрарди. Наталянинг ажойиб қобилияти мутахассислар томонидан юқори баҳоланди:
Мактаб йилларида классик рақсда фақат 5 баҳо олардим. Ўқишни тугатгандан сўнг улар мени “Болшой театр”га олиб кетишди. Агар ишга қабул қилинмаганимда аниқ биламан, касбимни ўзгартирган бўлардим. Мен бошқа театрда рақсга тушмасдим, дейди у.
Настенка образини Надежда Румянцева ўйнаши мумкин эди
“Аёз бобо”да Седихнинг рол ўйнашига билвосита сабаб бўлган нарса — бу балет: режиссёр Александр Роу уни “Ўлаётган оққуш” спектаклида кўриб, 15 ёшли балеринани ўзининг эртагига таклиф қилди, чунки унда ҳақиқий Настенкани кўрганди. Тўғри, Надежда Румянцева ҳам кастингга таклиф қилинганди, аммо Роу Наташани танлади. Аммо балет мактабида Наташа жуда кўп ёқимсиз нарсаларни тинглаши керак бўлди: раҳбарият талабанинг суратга тушишда иштирок этишига кескин қарши эди, чунки бу уни асосий дарслардан чалғитарди. Иқтидорли қиз учун унинг устози Суламиф Мессерер рухсат сўради ва Наташа суратга олиш гуруҳи билан Кола яриморолига жўнаб кетди. Суратга олиш пайтида у ўзининг биринчи муҳаббатини учратди: Настенкани ўзига ром этган йигит Иванушка ролини ўйнаган Эдуард Изотов эди.
“Аёз бобо”нинг муваффақияти кутилганидан ҳам ортиб кетди, Наталя Седих юлдузга айланди. Кейин яна бир нечта фильмда роллар ижро этди. Агар уни “Болшой театр”га қабул қилишмаса, у ВГИКка кириб, актриса бўлишга қарор қилди. Аммо у илк уринишдаёқ қабул қилинди ва тақдири ўша ерда белгиланди. У энди суратга тушишга ҳаракат қилмас, бор вақти ва бутун кучини севимли балетига бағишларди.
Рашкчи “Отелло” уни бўғиб ўлдиришига бир бахя қолди
Балерина шахсий ҳаёти учун ҳам вақт ажратди. Унинг бир нечта ўткинчи муносабатлари бўлса-да, турмушга чиқишга шошилмади: у балетга содиқ қолишни хоҳлади. Афсуски, кейинчалик балерина учун деярли фожиали якунланган воқеа юз берди. Ленинградда гастрол сафарида “Самовий қалдирғочлар” фильмига мусиқа ёзган бастакор Виктор Лебедев Наталяни севиб қолди. Танишувнинг биринчи оқшомида Лебедев Наташага босим ўтказди: унинг мақсадга эришиш ниятида ўзини қўпол тутиши Наташани ҳайратда қолдирди. Эртаси куни у айбини яшириш учун ўзини бутунлай бошқа одам сифатида кўрсатди. Наташа у билан учрашишга рози бўлди, муносабатлар ривожланди, у Лебедевни қандай севиб қолганини сезмади ҳам.
Аммо балеринанинг янги ишқий муносабатидан хабар топган “собиқ” ошиқлардан бири Ленинградга қараб югурди. Ташлаб кетилган эркак балеринага яширинча ҳужум қилиб, уни бўғиб ўлдирмоқчи бўлди. Наташа жуда қўрқиб кетди: у бўғилаётганини ҳис қилди. Уни фақат рашкчи “Отелло”нинг хотини бўлиш ваъдаси қутқарди. Наташа унинг қўлидан чиққач, Лебедевнинг олдига қочиб кетди.
“Меҳмон никоҳ”
Бу воқеаларнинг барчаси Наталянинг Лебедевга турмушга чиқишга рози бўлишига олиб келди. Икки йил ўтиб, улар турмуш қурди, аммо бастакор биринчи хотини билан ажрашиши керак эди. Уларнинг биргаликда яшаши ғалати эди. Наталя эса ҳаётини театрсиз тасаввур қила олмасди, шунинг учун у Москвада қолди. Виктор Лебедев Ленинград Бадиий академиясида дарс бергани учун шаҳарни тарк эта олмади. Учрашувлар камдан-кам, аммо соғинчга бой бўлди. Фақат жуфтликнинг ўғли Алёша туғилгандан сўнг Седих бир мунча вақт ҳеч қаерга кетмади, эри билан Ленинградда қолди. Аммо тез орада фақат она, хотин ва уй бекаси бўлиш унинг тақдири эмаслигини ҳис қилди, у чиндан ҳам рақсга тушиши керак эди. У яна театрга қайтиб, чақалоғини онаси ва ёлланган энагага ишониб топширди. Баъзан у Ленинградга келар, баъзида Виктор унинг ҳолидан хабар олиб турарди. Бир куни Наташа севгилиси учун кутилмаган совға тайёрлаб, олдиндан хабар бермасдан унинг ёнига учишга қарор қилди. Аммо балерина кутилмаган воқеа устидан чиқди: у турмуш ўртоғини хиёнат устида ушлади.
“Мен ўша пайтда 35 ёшда эдим, нафақага бир неча ой қолганди. Ниҳоят Санкт-Петербургга кўчиб ўтишимни ўйлаб, севинардим. Лебедев бир оз сабр қилиши керак эди. Қизиғи шундаки, унинг ҳисоби бўйича содир бўлган ҳамма нарсадан кейин гўёки мен уни ташлаб кетганман”, дейди актриса бу ҳақда.
“Мен фақат ўзимга ишонишга ўргандим”
Наталя Седихнинг ҳаётида яна бир қанча танловлар бўлди. Аммо у бошқа турмушга чиқмади. Унинг айтишича, ёлғизликда ўзини жуда яхши ҳис қилади: у эркин ва ҳеч кимга ҳисоб бермасдан хоҳлаган нарсасини қила олади. Катта театрдаги карьераси тугагандан сўнг (балериналар эрта нафақага чиқади), Марк Розовский Наталяни “Никицкий дарвозаларида” театрига таклиф қилди ва кейин у ўзининг актёрлик салоҳиятини англаб, яна бир нечта фильмларда рол ўйнади. Эҳтимол, унинг тақдири кимгадир ачинарли туюлиши мумкин: аслида Седих балет учун ҳамма нарсаси — кинодаги карьераси, шахсий ҳаётини қурбон қилди. Лекин у ўзини бахтли деб билади, умрини “Болшой театр”га бағишлаган йилларидан ҳеч қачон афсусланмайди.
“Мен фақат ўзимга ишонишга одатланганман. Шунда ҳеч ким менга хиёнат қила олмайди, зарар етказа олмайди”, дейди назокатли Настенка.
Изоҳ (0)