Якунланаётган йил инсонларда турли хил хотираларни қолдирди, 2022 йилда кимдир орзусига эришди, кимдир эса бахт қасрига қадам қўйди. Ўзбек шоу-бизнесининг айрим вакиллари ҳам айнан шу йилда ўз бахтини топиб, турмуш қурди. Қуйида шу ҳақда маълумот берилади.
Фаридам
Сардор Раҳимхоннинг клипи орқали танилиб, кейинчалик ўзи ҳам хонандаликка қадам қўйган Фаридам 2022 йилнинг 7 январь санасида турмушга чиқди. Собиқ хонанда анча пайтдан бери Туркиянинг Истанбул шаҳрида яшаб келаётган эди. У туркиялик хонанда Рафет Эл Роман билан ҳам дуэт куйлаган.
Жаҳонгир Хўжаев ва Асал Абдуллаева
Ўзбек шоу-бизнесида ўз ўрнига эга бўлган жуфтлик Жаҳонгир Хўжаев ва Асал Абдуллаеванинг никоҳ оқшоми 10 март куни пойтахтдаги «Яккасарой» тўйхонасида бўлиб ўтди. Тўйда ўзбек шоу-бизнесининг энг таниқли вакиллари: актёр, актриса, хонандалар ҳамда вайнерлар иштирок этди.
Келин-куёвни тўйхонада анъанавий тарзда Ўзбекистон халқ артисти Фаррух Зокиров «Келибди» қўшиғи билан қарши олди. Ундан кейин эса меҳмонларни Ёрқинхўжа Умаров, Улуғбек Раҳматуллаев, Алишер Файз ва бошқа таниқли хонандалар шўх тароналари билан хушнуд этди.
Жаҳонгир Хўжаев тўйида отасига машина калитини топширди, онаси ва қайнонасига эса Малика Равшанованинг «Бу менинг онам» қўшиғи садолари остида гулдаста тақдим этди.
Азиза Низомова
Актриса, хонанда Азиза Низомова 19 март куни севган йигити билан турмуш қурди. Унинг тўйи пойтахтдаги ресторанларнинг бирида бўлиб ўтди. Азиза Низомова ўз тўйида қўшиқ куйлади. Тўйда ўзбек шоу-бизнесининг кўплаб таниқли вакиллари меҳмон бўлди.
Паризода Усмонова
Инстаблогер, тиктокер Паризода Усмонова 2022 йилнинг 11 май куни турмуш қурди. Унинг тўйида ҳам ўзбек шоу-бизнесининг таниқли вакиллари, блогерлар, вайнерлар иштирок этди.
Каниза
Хонанда Каниза 25 май куни 7 йиллик севгилиси билан турмуш қурганини маълум қилди. «Биз бир-биримизни 7 йил синадик. Ҳатто айро йўллардан кетдик. Мен ҳурмат қиладиган эркак ўта рашкчи ва санъатни қабул қилолмайдиган бўлиши керак эди. Шундай инсонни севдим. Фақат бирга бўлишимиз учун йиллар керак бўлди. Ваниҳоят рашк, қайсарлик, ҳар хил шартлардан кўра севгимиз кучлилик қилди. Алҳамдулиллаҳ», — деб ёзади хонанда Instagram саҳифасида.
Маърифат Ортиқова
Фильм ва сериаллардаги маъсума аёл образи билан элга танилган актриса Маърифат Ортиқова 2 июль куни, 39 ёшида турмушга чиқди. Унинг тўйида ҳамкасблари ва яқинлари иштирок этди.
Baby Mohi
Инстаблогер, ковер тароналар ижрочиси 22 июнь куни Жасур Ҳурриятов билан турмуш қурди. Baby Mohi турмуш ўртоғи билан 2019 йили танишган ва тўйдан аввал бизнес ҳамкорликни йўлга қўйишган. Келин-куёвлар бренд либослар савдоси билан ҳам шуғулланишади.
Иззат Шукуров
Хонанда, актёр Тоживой Шукуровнинг ўғли Иззат Шукуров 27 июнь куни уйланди. Унинг тўйида ўзбек шоу-бизнесининг кўплаб таниқли вакиллари иштирок этди. Хонанда Иззат Шукуров ҳам ўз тўйида қўшиқ куйлади.
Музаффар Қурбонов
Хонанда Абдулла Қурбоновнинг ўғли Музаффар Қурбонов 2 сентябрь куни турмуш қурди. Унинг тўйида ўзбек шоу-бизнесининг таниқли вакиллари иштирок этди. Абдулла Қурбонов тўйга ташриф буюрган айрим ҳамкасблари устидан доллар сочди.
Жава Расулов
Инстаблогер Жавоҳир Расулов 7 сентябрь куни ҳамкасби Асал Ёқубова билан оила қурди. Унинг тўйида машҳур инстаблогерлар, вайнерлар ва хонандалар меҳмон бўлди.
Жавлонбек Олимов
Хонанда Авазбек Олимовнинг ўғли Жавлонбек Олимов 2022 йилнинг 23 октябрь куни уйланди. Унинг тўйида Фарруҳ Зокиров, Озодбек Назарбеков, Али Отажонов ва кўплаб машҳурлар иштирок этиб ижодидаги тароналарни ижро этди.
Рухшона
Биринчи турмуш ўртоғи продюсер, клипмейкер Санжар Маткаримов билан ажрашган хонанда Рухшона 3 сентябрь куни иккинчи марта турмуш қураётганини маълум қилди. Кейинчалик хонанда: «Турмуш ўртоғимнинг миллати ўзбек, Туркияда яшайди. Турмушга чиқдим, тўй қилмадик, чунки бундай истак ўзимда бўлмади. Бир марта тўйим бўлди, етади, бошқа келин кўйлак кийиш ниятим йўқ, дедим», — деб изоҳ берди.
Зара Ширинова
Телебошловчи Зара Ширинова 25 октябрь куни севган йигити билан турмуш қурди, бироқ куёв тўйда иштирок этмади. Зара Ширинова кейинроқ бу ҳолатга изоҳ бериб, бўлажак турмуш ўртоғи иш билан боғлиқ вазият туфайли тўйда иштирок этмаганини айтди.
Тимур Кубаев
Актриса Дилноза Кубаеванинг укаси Тимур Кубаев 2022 йилнинг 25 ноябрь санасида оила қурди. Унинг тўйида машҳур актриса ва актёрлар иштирок этди. Актёрнинг тўйи пойтахтдаги ресторанларнинг бирида бўлиб ўтди.
Фарҳод Маҳмудов
«Барон» фильмидаги роли билан мухлисларга яхши таниш бўлган актёр Фарҳод Маҳмудов 30 ноябрь куни Камилла исмли қиз билан оила қурди.
Актёр Фарҳод Маҳмудовнинг тўйида ўзбек санъатининг энг таниқли намоёндалари меҳмон бўлди.
Бунёд Раҳматуллаев
«Илҳақ», «Сеҳрли қалпоқча», «Йиғламагин» фильмидаги роллари билан томошабинлар қалбидан жой олган актёр Бунёд Раҳматуллаев ҳам 30 ноябрь куни уйланди. Унинг тўйи Тошкентдаги ресторанларнинг бирида бўлиб ўтди.
Жасур Умиров
Хонанда Жасур Умиров 3 декабрь куни Гўзал исмли қиз билан оила қурди. Тантанага ўзбек санъатининг кўплаб таниқли вакиллари ташриф буюрди. Унинг тўйи ҳам пойтахтдаги ҳашаматли ресторанларнинг бирида бўлиб ўтди.
«ВИА Мараканд», Ҳосила Раҳимова, Имрон, Озода Нурсаидова, Маҳмуд Намозов, Бунёдбек Саидов, Мавлуда Асалхўжаева, Асилбек Амануллоҳ, Воҳиджон Исоқов, Достон Эргашев ва бошқа кўплаб хонандалар никоҳ оқшомида қўшиқ куйлаб, келин-куёвга бахт тилади.
Келин-куёв Шоҳжаҳон Жўраевнинг «Битта бўлсин» қўшиғи садолари остида илк оилавий рақсини ижро этди.
Шаҳрам Ғиёсов
Бокс бўйича Рио олимпиадаси кумуш медали соҳиби, жаҳон чемпиони Шаҳрам Ғиёсовнинг Бухоро шаҳридаги тўйи 6 декабрь куни бўлиб ўтди. Никоҳ оқшомида таниқли спортчилар ва ўзбек шоу-бизнесининг кўплаб вакиллари иштирок этди.
Шунингдек, Шаҳрам Ғиёсов 12 декабрь куни Тошкент шаҳрида ҳам тўй ўтказди. Бу тўйда ҳам машҳур хонандалар иштирок этиб, ўз ижодидаги тароналарни ижро этди.
Интизор Тожибоева
Устазода санъаткор, қизиқчи Ҳожибой Тожибоевнинг қизи Интизор Тожибоева 18 декабрь куни оила қурди. Унинг тўйида ўзбек шоу-бизнесининг таниқли вакиллари, қизиқчилар, хонандалар иштирок этди.
Мавзуга доир:
- 2021 йилда оила қурган ўзбек шоу-бизнеси вакиллари (фото).
- Instagram: Ортиқ Султонов ўғлини уйлантирди, Интизор Тожибоева турмушга чиқди, Юлдуз Усмонова Умра сафаридан қайтди.
- Instagram: Зара Ширинова турмушга чиқди, Муқаддас Саъдуллаеванинг фарзанди билан боғлиқ кўнгилсиз ҳолат, мухлисасига кийимини совға қилган Юлдуз Усмонова.
- Instagram: 36 ёшни қарши олган Муниса Ризаева, Умра сафаридаги Шаҳло Зоирова, Рухшона турмушга чиқди.
- Тиктокер ҳамда cover қўшиқлар ижрочиси Baby Mohi турмушга чиқди ( фото, видео).
Изоҳ (0)