Россия Меҳнат вазирлиги мигрантларнинг энг юқори маошларини маълум қилди. 2025 йилда малакали хорижий ишчиларни жалб қилиш бўйича умумроссия квотаси қарийб 235 минг иш рухсатномасини ташкил этади.
Улардан энг кўпи Хитой бизнеси фаол иштирок этаётган Амур вилоятига (27,1 минг), Москва вилоятига (23 минг), Ленинград вилоятига (22,3 мингга яқин) ва Татаристонга (9,3 минг) ажратилган; квота захираси эса 78 минг ўриндан иборат.
Ушбу маълумотлар РБК томонидан таҳлил қилинган Меҳнат вазирлигининг 9 декабрдаги “РФга виза асосида келадиган хорижий ишчиларни жалб қилиш учун 2025 йил учун касблар (мутахассисликлар, лавозимлар) рўйхатини тасдиқлаш тўғрисида”ги буйруғидан олинган.
Ушбу ҳужжат лойиҳасига кўра, 2024 йилда виза асосидаги мигрантларни ёллашга бўлган эҳтиёж 1,5 баравар паст баҳоланган ва 155,9 минг кишини ташкил этган. Хорижий ишчи кучини жалб қилиш сабаблари орасида ҳудудларда зарур кадрларнинг етишмаслиги ва хизмат кўрсатиш ҳамда созлашга муҳтож бўлган импорт ускуналарининг ишга туширилиши кўрсатилган.
Ушбу квоталар фақат виза асосида мамлакатга келадиган хорижликлар учун амал қилади. Квоталар ҳажми ҳудудий ҳокимият органларининг таклифлари асосида белгиланади, бунда эҳтиёжларнинг умумий миқдори захира сифатида 50 фоизга оширилади.
“Амалда квотанинг ўртача бажарилиш даражаси тахминан 60 фоизни ташкил этади. Жалб этиладиган хорижий мутахассислар сонини келишиш ишчи визаларини автоматик равишда беришни англатмайди, бу масала билан ИИВ шуғулланади”, деб ёзади РБК.
РФ Меҳнат вазирлигига яқин манбанинг аниқлик киритишича, кўпинча бундай механизм орқали Хитой, Туркия, Сербия, Ҳиндистон ва Вьетнамдан мутахассислар жалб қилинади.
РБК томонидан ҳудудлар бўйича ўрганилган аризаларга кўра, чет эллик мутахассислар учун энг юқори тахминий иш ҳақи ойига 380 минг рубль (тахм. 47 млн сўм)ни ташкил этади, 100 минг рублдан ортиқ маош таклиф қилинган аризалар сони эса юзга яқин. Виза асосида ишлайдиган ходимлар учун лавозимларнинг тахминан ярми ойига 60 минг рублдан кам даромад олишни назарда тутади, бироқ ойига атиги 20-25 минг рубль маош таклиф қилинган йигирматача ариза ҳам мавжуд.
Энг юқори маош олувчи хорижликлар қаерга жойлаштирилади?
Барча минтақавий аризалар орасида 2025 йил учун энг юқори маошли лавозим ойига 380 минг рубль маош билан Россия-Германия ташқи савдо палатаси бошқарув раиси лавозимидир. Бу лавозимни 2016 йилдан бери Маттиас Шепп эгаллаб келмоқда.
Иккинчи ўринда В.И. Кудинов номидаги “Удмуртнефть” компаниясида учта менежер учун ойлик маоши 275 минг рубль бўлган квота турибди. “Барнаул” баскетбол клубининг иккита спортчи-инструктори 250 минг рубль маошли вакансия эса учинчи ўринни эгаллаган.
Изоҳ (0)