Ўзбекистондан Россияга меҳнат мигрантлари оқими камайиши мумкин. Бу ҳақда Ўзбекистон Ташқи меҳнат миграцияси агентлиги бўлим бошлиғи Алишер Рўзиев маълум қилди.
Унинг таъкидлашича, ҳозир Ўзбекистонда қурилиш соҳаси фаол ривожланмоқда, баъзи объектлардаги иш ҳақи эса Россиядаги меҳнат ҳақи билан рақобатлаша олади.
“Бугунги кунда Ўзбекистонда қурилиш соҳасида кескин ўсиш бўлмоқда ва табиий равишда, биздаги иш ҳақи Россиядаги баъзи объектларники билан тенглашиб қолди. Шу сабабли ушбу вазиятда Россияга жўнаб кетаётган фуқароларимиз оқимининг пасайиш тенденцияси кузатилиши мумкин”, — деди Алишер Рўзиев.
Ташқи меҳнат миграцияси агентлиги бўлим бошлиғининг айтишича, Ўзбекистондаги баъзи йирик қурилиш объектларида қурилиш ихтисосликлари бўлган ишчилар ойига 500−600 доллар ишлаб топмоқда.
“Шунга кўра, бундай иш ҳақи учун Россияга бориш энди манфаатли бўлмай қолди”, — дея қўшимча қилган агентлик вакили.
Шунингдек, унинг билдиришича, Ўзбекистон Ташқи меҳнат миграцияси агентлиги сўнгги икки йилда фуқароларни хорижда ишга жойлаштириш географиясини сезиларли даражада кенгайтирди. Бу Европада ишчи кучига бўлган талаб ошгани ҳисобига ҳам бўлган.
Июнь ойи бошларида Ўзекистон президенти матбуот котиби Шерзод Асадов Россиядаги ўзбекистонлик меҳнат мигрантлари сони 4-6 миллиондан 1 миллион кишига камайганини маълум қилганди. Россия президенти Владимир Путиннинг Ўзбекистонга давлат ташрифида икки давлат раҳбари меҳнат муҳожирларининг бугунги кундаги умумий сони бўйича шундай маълумотни айтган.
10 май куни Шавкат Мирзиёев раислигидаги видеоселектор йиғилишида 2024 йилнинг январь—март ойларида меҳнат миграциясидан 58 минг нафар, апрелда 57 минг нафар фуқаро қайтиб келгани маълум қилинганди. Йил охиригача яна 250-300 минг киши қайтиши прогноз қилинмоқда. Қайтган фуқароларни ишга жойлаштириш юзасидан топшириқлар берилган.
Изоҳ (0)