Сурия ҳукуматига қарши қуролли мухолифат кучлар Дамашққа яқинлашганда, Россия Сурия президенти Башар Асад ва унинг оиласига, агар у зудлик билан кетишга рози бўлса, “хавфсиз эвакуация”ни таклиф қилган. Бу ҳақда бир нечта номаълум манбага асосланиб Bloomberg хабар берди.
Нашрнинг икки манбаси Асадни Россиянинг Суриядаги авиабазаси орқали олиб кетилганини таъкидлаган. У бортида бўлган самолётнинг транспондери кузатувдан қочиш учун ўчирилган. Bloombergънинг учта аноним суҳбатдошининг сўзларига кўра, Россия Асадни “қуролли гуруҳларга қарши курашда мағлуб бўлгани”га ишонтиришга ҳаракат қилган.
Россия ТИВ вакили Мария Захарова брифингда Башар Асадни эвакуация қилишда Россия ёрдами ҳақидаги саволга жавоб берар экан, “инсонпарварлик чораси доирасида зарур даражада ёрдам кўрсатилгани”ни қайд этган.
Суриядаги вазият
Ноябрь ойи охирида қуролли исёнчилар Сурия шимолий қисмига юришни бошлади. Улар Идлиб вилоятини, мамлакатдаги аҳоли сони бўйича иккинчи ўринда турувчи Ҳалаб шаҳрини, Хама ва Хомс вилоятлари ҳудудларининг бир қисмини ўз назоратига олди. Шундан сўнг Дамашққа кирди. Президент Башар Асад оиласи билан мамлакатни тарк этди.
Россия Ташқи ишлар вазирлиги Башар Асад исёнчилар билан келишувга эришиб, истеъфога чиқишга рози бўлгани, шундан кейин Сурияни тарк этгани ҳақида маълумот берди. Исёнчилар Асадни қўлга олишда ёрдам берадиган маълумот учун 10 миллион доллар ваъда қилган.
Сиёсатчи мамлакатни тарк этганидан кейин исёнчилар Асад қароргоҳига бостириб кирган, одамлар буюмларни талон-торож қилган. Қароргоҳдаги гаражда BMW, Audi, Ferrari, Lamborghini Diablo каби 50 га яқин ҳашаматли ва қимматбаҳо автомобиллар аниқланган.
Кечроқ Кремлдаги манбалар Суриядан қочган президент оиласи билан Москвага келгани, Путин уларга бошпана берганини маълум қилди.
10 декабрь куни Идлиб шаҳрида қўзғолончиларга раҳбарлик қилган Муҳаммад ал-Башир ўзини Суриянинг ўтиш даври ҳукумати раҳбари этиб тайинлади. У фуқароларга қарата қилган телевидениэ мурожаатида бу лавозимни камида 2025 йил 1 мартгача эгаллаб туришини маълум қилди.
Изоҳ (0)