Россия 2023 йил бошқа мамлакатларга кредит бериш ҳажмини сезиларли ошириб, 30 миллиард доллардан ортиқ кўрсаткичга эришди. Бу 1999 йилдан бери қайд этилган энг юқори кўрсаткичдир. Ушбу маълумотлар Жаҳон банки таҳлиллари асосида аниқланди.
Энг кўп кредитлар Миср, Бангладеш ва Ҳиндистонга берилган. Чет давлатларнинг Россия олдидаги қарзи 2023 йилда 1,3 миллиард долларга ошиб, жами 30,1 миллиард долларни ташкил этган. Қарз миқдори бундан олдин фақат 1999 йилда 32,8 миллиард доллар бўлганди.
Энг йирик қарздор Беларусь бўлиб қолмоқда — унинг қарзи 7,75 миллиард долларни ёки Россия берган барча кредитларнинг чорак қисмини ташкил этади. Иккинчи ўринда 6,6 миллиард доллар (22 фоиз) билан Бангладеш турса, учинчи ўринни 4,1 миллиард доллар (14 фоиз) билан Ҳиндистон эгаллаган. Бешинчи ўринга Миср (3,3 миллиард доллар, 11 фоиз) ва Вьетнам (1,4 миллиард доллар, 5 фоиз) киради.
Ўтган йили энг кўп қарз олган мамлакат Миср бўлди — унинг мажбуриятлари бирйўла 1,45 миллиард долларга ошди. Бангладешнинг қарзи 745 миллион долларга, Ҳиндистонники эса 363 миллион долларга кўпайди. Ўзбекистоннинг қарздорлиги 41,3 миллион долларга, Афғонистонники эса 19,9 миллион долларга ўсди.
Шунингдек, Замбия, Яман, Шри Ланка, Эквадор, Судан ва Молдова давлатларининг мажбуриятлари ҳам ортиб, жами 26,54 миллион долларга етди.
Ўтган йили янги қарздор давлат — Никарагуа пайдо бўлди. У 2003 йилдан буён илк бор Россиядан 16,9 миллион доллар миқдорида қарз олди.
Қарзи камайган давлатлар
Шу билан бирга, бир қатор давлатларнинг Россия олдидаги қарзлари камайди. Бу борада Сомали етакчилик қилмоқда, чунки Россия унинг деярли барча қарзини кечган: агар 2022 йил охирида мамлакат 703 миллион доллар қарздор бўлган бўлса, ўтган йил охирига келиб бу миқдор атиги 49 миллион долларгача тушди.
Бундан ташқари, Беларуснинг қарзи 487 миллион долларга, Сербиянинг қарзи 117 миллион долларга, Арманистоннинг қарзи 40 миллион долларга, Озарбайжоннинг қарзи эса 22 миллион долларга камайди. Яна 10 та давлат Россия олдидаги 82 миллион долларлик қарзини тўлиқ тўлади.
Изоҳ (0)