Ўзбекистон ва Туркманистон тўғридан тўғри авиақатновларни қайта йўлга қўйиш бўйича келишувга эришди. Бу ҳақда транспорт вазири Илҳом Маҳкамов “Ўзбекистон 24” телеканалига берган интервьюсида маълум қилди.
“Бугунги кунда Туркманистон билан тўғридан тўғри авиақатновлар мавжуд эмас. Бугун биз ҳужжатга қўл қўйдик. Яъни, барча жозибадор тарафларини кўрсатган ҳолда, барча имкониятларни яратган ҳолда, қисқа кунларда икки томонлама тўғридан тўғри авиақатновларни бошлашга имконият яратилади”, деди у Туркманистонга ташрифи чоғида берган интервьюсида.
22 август куни Шавкат Мирзиёев Авазада Ўзбекистон, Туркманистон ва Озарбайжон раҳбарларининг уч томонлама учрашуви бўлиб ўтганди. Тренд нашрининг ёзишича, уч томонлама учрашув якунида транспорт вазири Илҳом Маҳкамов ва Туркменистан Airlines давлат хизмати раиси Довран Сабуров фуқаро авиацияси соҳасида ҳамкорликни ривожлантириш тўғрисидаги баённомани имзолади.
Ўзбекистон ва Туркманистон ўртасида тўғридан тўғри авиақатновлар
Икки давлат ўртасида тўғридан тўғри авиақатновлар 2013 йил май ойида тўхтатилган. Бунга йўналишнинг даромадли эмаслиги сабаб бўлган. Яъни, Тошкент—Ашхобод парвози йўловчилар сони етарли бўлмагани боис, иқтисодий жиҳатдан самарасиз деб топилган.
2017 йил июлида Тошкентда икки давлат авиакомпаниялари вакиллари ўртасида музокаралар ўтказилиб, йил охиригача Ашхобод—Тошкент—Ашхобод йўналишида авиарейсларни амалга ошириш масалалари муҳокама этилди. Томонлар Тошкент халқаро аэропортида Туркманистон авиакомпанияси ҳаво кемаларига хизмат кўрсатиш ва борт таомлари билан таъминлашга қаратилган шартномани имзолади. 2018 йилда Ўзбекистон ва Туркманистон пойтахтлари ўртасида авиақатновлар қайта тикланиши маълум қилинди.
2021 йил августида ҳам икки мамлакат Транспорт вазирликлари томонидан санитария-эпидемиология талабларига риоя этган ҳолда тўғридан тўғри ҳаво транспорти қатновларини қайта тиклаш масалалари устида иш борилишига келишиб олинди. Лекин амалда тикланмади.
Изоҳ (0)