Ўтказилган сўровнома натижаларига кўра, кўплаб меҳнат мигрантлари Ўзбекистонга қайтишга шошилмаяпти. Улар юз бераётган иқтисодий қийинчиликларга қарамай, Россияда қолишни афзал кўрмоқда. Бу ҳақда «Курсив» нашри хабар берди.
Март ойида Россия Федерациясидан Ўзбекистонга 50 минг меҳнат муҳожири қайтган. Йил бошидан буён эса бу кўрсаткич 133 мингтани ташкил этган. Таққослаш учун: ўтган йили Россиядан Ўзбекистонга 280 минг меҳнат муҳожири қайтган.
Март ойи охирида президент Шавкат Мирзиёев мамлакат ичида қўшимча 100 минг кишини расман иш билан таъминлаш зарурлигини – биринчи навбатда, қайтиб келган муҳожирлар қурилиш ишларига жалб этилишини таъкидлаб ўтган эди.
Россия Ўзбекистон ишчи кучининг энг йирик импортчиси ҳисобланади. Ташқи меҳнат миграцияси масалалари агентлиги маълумотларига кўра, 2021 йилда 1,5 миллион ўзбекистонлик хорижда меҳнат қилган бўлса, уларнинг 1 миллиондан ортиғи Россия Федерациясида бўлган.
Хориждан мамлакатга пул ўтказмаларининг 70 фоизи Россиядан келади. Ўзбекистоннинг айрим ҳудудларида хориждан пул ўтказмалари умумий уй хўжаликлари даромадларининг 27,1 фоизини ташкил қилади.
Россияда ўзбекистонлик меҳнат муҳожирлари 35-45 минг рубль (430-550 доллар) маош олади. 2021 йил якунига кўра, Ўзбекистонда ўртача ойлик иш ҳақи 3,2 млн сўмни (280 доллар) ташкил қилган.
Марказий банк маълумотларига кўра, рубль курси Украинада уруш бошланишидан олдин (24 февраль) 136,24 сўм бўлган. 15 мартга келиб 97,81 сўмгача арзонлашган. 12 апрелда урушгача бўлган даврдан ҳам баландроқ –142,96 сўмни ташкил этган.
Россиядан Ўзбекистонга пул ўтказишнинг бир нечта усулларидан бири бўлган Unistream пул ўтказмалари тизими вакиллари шундай изоҳ беришди:
Март ойи бошида Россиядан Ўзбекистонга пул ўтказмалари ҳажми камайган, бироқ ой ўртасидан бошлаб бу қиймат яна ўз ҳолига қайтган. Апрель ойининг биринчи ҳафтасида Unistream’нинг Россиядан Ўзбекистонга ўтказмалари ҳажми 2022 йил март ойининг шу даврига нисбатан 10 баробар кўп бўлди.
Ташқи меҳнат миграцияси масалалари агентлиги меҳнат муҳожирлари ўртасида аноним сўров ўтказди. Унда тахминан 15 минг респондент иштирок этди. Хўш, улар ўз ватанларига қайтиш ёки Россияда ишлаш учун қолиб кетишни режалаштиряптими?
Респондентларнинг 40 фоизи уйига қайтаётганини билдирган. Бунга сабаб қилиб, улардан деярли учдан икки қисми рублнинг қадрсизланишини айтган бўлса, қолганлари ишсиз қолганини кўрсатган. Респондентларнинг 60 фоизи Россиядан Ўзбекистонга қайтмоқчи эмаслигини билдирган.
Москва вилояти ҳукумати ҳузуридаги Миллатлар масалалари бўйича маслаҳат кенгашининг амалдаги аъзоси Асилбек Эгембердиев шундай изоҳ берди:
Ишсиз қолган меҳнат муҳожирларининг аксарияти иш излаб Россия Федерациясининг бошқа ҳудудларига кўчиб кетади.
Эгембердиевнинг сўзларига кўра, чет эллик ишчилар Кавказга, Чеченистонга қурилиш ишларига, шунингдек, Ростов вилоятидаги конларга боради. Бундан ташқари, унинг қайд этишича, айрим муҳожирлар Россия Федерациясида содир этилган ҳуқуқбузарликлари туфайли уйларига бормайдилар.
Чунки улар Россия ҳудудини тарк этса, мамлакатга қайта олмайди. Шунинг учун улар камроқ маош эвазига ишлашни давом эттиришдан манфаатдор ҳисобланишади.
Аввалроқ «Ўзбекистон Россиядан меҳнат мигрантларининг оммавий тарзда қайтишига тайёрми?» мавзусида Ташқи меҳнат миграцияси агентлиги ходимлари билан суҳбат бо‘либ ўтган эди.
Изоҳ (0)