Россияда ўзбекистонлик меҳнат мигрантлари сони кескин камайди

Россиядаги ўзбекистонлик меҳнат мигрантлари сони бугунги кунда 1 миллион нафарни ташкил этмоқда. Бу ҳақда президент матбуот котиби Шерзод Асадов “Севимли” телеканали журналистига берган интервьюсида маълум қилди.

Унинг билдиришича, Россия президенти Владимир Путиннинг Ўзбекистонга давлат ташрифида икки давлат раҳбари меҳнат муҳожирларининг умумий сони бўйича бир хил маълумотни айтди — бугунги кунда Россияда меҳнат қилаётган ўзбекистонлик мигрантлари сони бир миллион нафарга тенг.

Статистик маълумотларга қараганда, Россияда 2016 йилгача ўртача 4 миллиондан ортиқ, ҳатто 6 миллионга яқин муҳожир меҳнат қилар эди.

“Бу дегани агар 2016 йилгача энг кам статистикани, яъни 4 миллионни оладиган бўлсак ҳам, камида 3 миллион муҳожиримиз юртимизга қайтди. Мана шу кўрсаткичнинг ўзи ҳам мамлакатимизда амалга оширилаётган иқтисодий ислоҳотлар самарасини кўрсатади, деб биламан”, — деди Асадов.

10 май куни президент раислигидаги видеоселектор йиғилишида 2024 йилнинг январь март ойларида меҳнат миграциясидан 58 минг нафар, апрелда 57 минг нафар фуқаро қайтиб келгани маълум қилинганди. Йил охиригача яна 250-300 минг киши қайтиши прогноз қилинмоқда. Қайтган фуқароларни ишга жойлаштириш юзасидан топшириқлар берилган.

Президент матбуот котибининг қайд этишича, Бухородаги ташриф чоғида давлат раҳбари биринчи навбатда, ишсизлар сонини камайтириш, шу билан бирга кам даромадли аҳолини даромадларини кўпайтириш бўйича стратегик вазифаларни белгилаб берган.

Тадбиркорлик соҳасининг ривожланиши учун Бухоро вилоятига турли молиявий ресурслар жалб қилган ҳолда 10 триллион миқдордаги кредит ресурсларни ажратиш ва турли хил инфратузилмавий лойиҳаларга 160 миллион доллар ажратиш топшириғи берилди.

“Бухоро вилояти аҳолиси 2 миллиондан сал кўпроқ. Шундан 55 мингта расман ишсиз фуқаро бўлса, 67 минг нафар меҳнат мигранти бор”, — дейди Асадов.

Унинг таъкидлашича, президент халқ билан мулоқот қилишни жуда яхши кўради ва бу хусусиятларини меҳнат фаолиятининг илк кунларидан кузаца бўлади.

“Ирригация институтига проректор бўлганларида ҳам асосий вақтларини талабаларнинг муаммоларини ечиш билан банд бўлганлар, кейинчалик меҳнат фаолиятларини оладиган бўлсак, Мирзо Улуғбек туманида, Жиззах вилоятида Самарқанд вилоятида ҳоким ва 14 йил бош вазир бўлганларида ҳам фақат ҳудудларга чиқиб, оддий аҳолини қийнаётган масалаларга ечим топиш билан шуғулланганлар”, — дейди президент матбуот котиби.

Шавкат Мирзиёев имкон қадар йил давомида энг камида бир ёки икки марта ҳар бир ҳудудга чиқиб, иқтисодий ижтимоий ривожланишини кузатишга ҳаракат қилади.