Сурия исёнчи жангчилари тахтдан ағдарилган президент Башар Асаднинг отаси, собиқ президент Ҳофиз ал-Асаднинг қабрини вайрон қилишди.
BBC томонидан тақдим этилган видеоларда қуролланган шахслар Латакия қирғоқбўйи минтақасининг шимоли-ғарбидаги Қардаҳадаги ёнаётган мақбара атрофида юриб, шовқин солаётгани тасвирланган.
Ҳаят Таҳрир ал-Шам (ҲЦҲ) исломий гуруҳи бошчилигидаги исёнчилар Сурия бўйлаб яшин тезлигида ҳужум қилиб, Асад сулоласининг 54 йиллик ҳукмронлигини ағдарди. Башар ал-Асад Россияга қочиб кетди ва у ерда оиласи билан бошпана олди.
Сурияликлар Асадлар ҳукмронлиги тугаганини нишонлаб, бутун мамлакат бўйлаб Ҳофиз ва унинг ўғли тасвирланган ҳайкаллару плакатларни вайрон қилишди.
“2011 йилда Башар Асад тинч демократия тарафдори қўзғолонни шафқатсизларча бостирган. Бу эса вайронкор фуқаролар урушини келтириб чиқарган эди. Уруш натижасида ярим миллиондан ортиқ одам ҳалок бўлган ва яна 12 миллион киши ўз уйларини ташлаб кетишга мажбур бўлди”, дейилади BBC хабарида.
Ҳофиз ал-Асад Сурияни 1971 йилдан 2000 йилда вафот этгунга қадар бошқарган, сўнг ҳокимият ўғлига ўтган.
У Суриядаги диний озчиликни ташкил этувчи алавийлар оиласида туғилиб ўсган. Алавийларнинг асосий аҳоли маркази Туркия чегараси яқинидаги Ўрта ер денгизи соҳилидаги Латакия вилоятида жойлашган.
Мамлакат аҳолисининг тахминан 10 фоизини ташкил этувчи кўплаб алавийлар Асадлар узоқ вақт ҳокимиятда бўлганида уларнинг қатъий тарафдорлари бўлган. Эндиликда уларнинг аксарияти ғолиб исёнчилар томонидан нишонга олинишидан хавотирда.
9 декабрь куни ҲЦҲ ва яна бир сунний мусулмон гуруҳи — “Озод Сурия армияси” аъзоларидан иборат исёнчилар делегацияси Қардаҳа оқсоқоллари билан учрашди ва уларнинг қўллаб-қувватлашига эришди.
ҲЦҲ ва мухолифат исёнчи гуруҳлар кўп йиллик фуқаролар урушидан сўнг 8 декабрь куни Сурия пойтахти Дамашқ устидан назоратни қўлга киритди. ҲЦҲ раҳбари Абу Муҳаммад ал-Жўлоний ўзининг ҳақиқий исми Аҳмад ал-Шараа эканини маълум қилди. У 2016 йилда Ал-Қоида билан алоқаларини узган собиқ жиҳодчидир. Жўлоний, шунингдек, турли диний гуруҳлар ва жамоаларга бағрикенглик ваъда қилди.
Суриядаги вазият
Ноябрь ойи охирида қуролли исёнчилар Сурия шимолий қисмига юришни бошлади. Улар Идлиб вилоятини, мамлакатдаги аҳоли сони бўйича иккинчи ўринда турувчи Ҳалаб шаҳрини, Хама ва Хомс вилоятлари ҳудудларининг бир қисмини ўз назоратига олди. Шундан сўнг Дамашққа кирди. Президент Башар Асад оиласи билан мамлакатни тарк этди.
Россия Ташқи ишлар вазирлиги Башар Асад исёнчилар билан келишувга эришиб, истеъфога чиқишга рози бўлгани, шундан кейин Сурияни тарк этгани ҳақида маълумот берди. Исёнчилар Асадни қўлга олишда ёрдам берадиган маълумот учун 10 миллион доллар ваъда қилган.
Сиёсатчи мамлакатни тарк этганидан кейин исёнчилар Асад қароргоҳига бостириб кирган, одамлар буюмларни талон-торож қилган. Қароргоҳдаги гаражда BMW, Audi, Ferrari, Lamborghini Diablo каби 50 га яқин ҳашаматли ва қимматбаҳо автомобиллар аниқланган.
Кечроқ Кремлдаги манбалар Суриядан қочган президент оиласи билан Москвага келгани, Путин уларга бошпана берганини маълум қилди.
Изоҳ (0)