Ўзбекистон Республикаси Бандлик ва меҳнат вазирлиги Fergana.news’да эълон қилинган «Мурда учун миллион» («Миллион за груз 200») мақоласига ўз муносабатини билдирди.
Ўзбекистон Республикаси Бандлик ва меҳнат муносабатлари вазирлиги «Буюк Келажак» экспертлар кенгаши аъзоси Баҳром Исмаиловга меҳнат муҳожирлари ҳуқуқлари масаласи билан шуғулланишни таклиф этди.
Эслатиб ўтамиз, Б.Исмаилов Россиядаги ўзбекистонлик меҳнат муҳожирларига юридик ёрдам лойиҳаси тўғрисидаги Fergana.news сайтига интервью берган эди. У ташқи меҳнат миграцияси агентлигига исталган юрист тендерда қатнашиб ўзбекистонлик фуқароларнинг манфаатларини ҳимоялаш имконини қўлга кирита оладиган электрон майдон ташкил этишни таклиф қилган. Юрист ушбу тизимни ташкил этиш бўйича барча харажатларни ўз зиммасига олишга тайёрлиги, бироқ вазирликдан жавоб бўлмаганини билдирган.
Вазирлик ўз жавобида мазкур лойиҳанинг дастлабки кўриниши тижорат ҳамда маълум гуруҳдаги одамларга фойда келтирилишини назарда тутгани туфайли мутахассислар томонидан ушбу жиҳатни бекор қилиш ҳамда молиялаштиришни тўлиқ вазирлик ҳисобига ўтказиш масаласини кўтарган.
Лойиҳа ижтимоий-гуманитар кўринишга ўтиши билан боғлиқ ўзгаришлар муносабати билан вазирлик мутахассислари барча хоҳловчиларни мазкур масала муҳокамасига таклиф этади.
Бундан ташқари, вазирлик азият чеккан ёки ҳалок бўлган фуқаролар оиласига кўрсатиладиган юридик хизматларни ҳам юз фоиз молиялаштиришга тайёрлигини билдирган.
Шунингдек, вазирлик Ўзбекистон тарихида биринчи марта сўнгги йилнинг ўзида:
— Россия ва Корея меҳнат мигрантлари бўйича амалдаги чоралар кўрилганини маълум қилди. Жумладан, хорижда меҳнат қилаётган фуқаролар ҳуқуқлари ва манфаатларини ҳимоя қилиш фонди ташкил этилган;
— Москва ҳамда Кванжу шаҳарларида Ташқи меҳнат миграцияси агентлиги вакиллиги очилган;
— Россия ИИВ хорижлик фуқароларни вақтинчалик сақлаш марказидан 1314 нафар ўзбекистонлик ватанига қайтарилган ва бу жараён давом этмоқда;
— Россия, Корея, Туркия, Қозоғистон ва Японияда ҳалок бўлган 94 нафар фуқаро жасадини олиб келиш ташкиллаштирилган ва молиялаштирилган;
— хорижий иш берувчилардан Ўзбекистон фуқаролари фойдасига 296 520 доллар тўланмаган маош ундирилган;
— 12 744 нафар фуқарога бепул юридик маслаҳатлар ҳамда ҳуқуқий кўмак кўрсатилган.
Айни пайтда ҳам Москва вилояти Серпухов туманида қулликка тушиб қолган 14 нафар фуқарони Ўзбекистонга қайтариш бўйича амалий ёрдам кўрсатилаётгани билдирилган.
Изоҳ (0)