Россияда ишсизлар сони 5-6 миллион кишини ташкил қилиши мумкин, бироқ бу юз бериши мумкин бўлган сценарийлардан бири, деган мамлакат меҳнат вазири Антон Котяков. Бу ҳақда «РБК» хабар қилди.
«Иқтисодиётнинг олий мактаби тахмин қилаётган 5-6 миллион ишсиз ҳақида гапирганда, бу воқеалар ривожидаги битта тахмин, сценарий эканини инобатга олишимиз лозим. Меҳнат вазирлиги бу борада вазиятни таҳлил қилмоқда, яъни бозордаги тенденцияларни ўрганиб бормоқда ва сценарийлардан бири шундай якун топишини мумкинлигини тушуниб турибмиз», — деган вазир.
Унинг сўзларига кўра, мамлакатда тахминан 3,7 миллион аҳоли ишсиз, улар орасидан қарийб 950 минг нафар одам бандлик марказларида рўйхатга олинган. Ҳозирда бандликни сақлаб қолиш тенденцияси кузатилмоқда — бу ҳукумат томонидан амалга оширилаётган чоралардан биттаси.
Аввал БМТ прогнозига кўра, коронавирус оқибатида юзага келган инқироздан кичик ва ўрта кўрхоналар, қишлоқ хўжалиги ходимлари, ўз-ўзини банд қилганлар, қочоқлар ва меҳнат мигрантлари энг кўп зарар кўриши хабар қилинганди.
Иқтисодиётнинг олий макатаби ректори Ярослав Кузминовнинг айтишича, базавий сценарийда 2020 йил давомида Россияда ишсизлик кўрсаткичи 8 фоизни ташкил қилади.
«Корпоратив сектор 2020 йилда 700 минг нафар ишчи, корпоратив бўлмаган сектор эса 1,5 миллион нафар ишчи йўқотади, бироқ бунда тикланиш жараёни иккинчи соҳада тезроқ кечади», — деган у. Ушбу сценарийга кўра, 2024 йилда ишсизлик даражаси 2019 йилдагидан ҳам баландроқ бўлади.
Бироқ энг ёмон тахмин бўйича Россияда 2020 йилда ишсизлик даражаси 9,5 фоизга чиқиши, 2021 йилда эса 9,8 фоизгача ўсиши мумкин. Ишсизликнинг юқори даражаси 2020 йилда ҳам сақланиб туради, ушбу даврда кўрсаткич 2019 йилдагидан икки баравар кўп бўлиши ва 8,1 фоизга етиши мумкин.
Россия президенти Владимир Путин 15 апрелда кичик ва ўрта бизнес корхоналарига ҳукумат томонидан ходимларига маош тўлаши учун маблағ ажратиш ҳақида топшириқ берган. Путиннинг сўзларига кўра, ҳар бир ходимга ойига ўртача 12 минг 130 рубл (қарийб 1 миллион 667 минг сўм) ажратилади. Ушбу маблағни олиш учун корхона 1 апрелдаги кўрсаткичга нисбатан 90 фоиз иш ўрнини сақлаб қолиши лозим.
Мавзуга доир: Коронавирус сабабли Россия иқтисодиёти кунига 100 млрд рубл йўқотаётгани маълум қилинди
Изоҳ (0)