Россия ҳар ойда 6 мингдан ортиқ Shahed дронларини ишлаб чиқаришни режалаштирмоқда. Бу ҳақда CNN телеканали Украина ҳарбий разведка манбасига таяниб хабар берди.
Россияда мазкур моделдаги дронларни йиғиш нафақат сон жиҳатдан ортган, балки ишлаб чиқариш харажатлари ҳам кескин камайган. Материалга кўра, 2022 йили Москва битта дрон учун ўртача 200 минг доллар тўлаган бўлса, жорий йилга келиб бу қарийб 70 минг долларгача тушган. Телеканал мазкур тенденцияни Татаристондаги Алабуга заводи кенг кўламли ишлаб чиқаришни йўлга қўйгани билан изоҳлайди.
Бироқ дронлар Россия учун қанчага тушаётгани ҳақида баҳолар турличадир. Стратегик ва халқаро тадқиқотлар маркази (CСИС) ҳисоб-китобига кўра, Shahed-136 дронларининг ҳар бири 20–50 минг доллар атрофида туради. Таққослаш учун, битта ҳаво ҳужумидан мудофаа ракетаси эса 1-3 миллион доллардан ортиққа тушиши мумкин.
Бу каби дронлар ўзининг арзон нархи билан Кремлга Украина шаҳарларини нишонга олиш ва буни кун сайин интенсивлаштириш имконини бермоқда. CСИС таҳлилчилари уруш бошида йирик масштабли ҳужумлар ойига бир марта кузатилганига, ҳозир эса украиналиклар бундай таҳдидга ҳар 8 кунда бир марта дуч келаётганига диққат қаратган.
Шу жумладан, 21 август куни Россия кенг кўламли уруш бошланганидан бери энг йирик дрон ҳужумлардан бирини амалга оширди. Бир кечада 600 дан ортиқ учувчисиз учиш қурилмаси ҳамда ракеталар учирилди. Украина ҳаво мудофаа тизимлари 577 та нишон, жумладан “Кинжал” ва “Калибр” ракеталари тутиб олинганини маълум қилган.
Украина ҳам ортда қолмоқчи эмас
ОАВ хабарига кўра, Украина ҳам ўзининг узоқ масофали ФП-1 зарбдор дронини конвейрга олган. Шунингдек ишлаб чиқариш қуввати Татаристондаги Алабуга заводига яқинлашган.
Изоҳ (0)