Сўнгги икки йил давомида Россия Федерацияси ҳудудида Қирғизистондан келган муҳожирлар сони 49 фоизга камайган. Бу ҳақда Қирғизистон Ташқи ишлар вазирлиги ҳузуридаги Консуллик департаменти берган баёнотга асосланиб, “АКИпресс” нашри хабар берди.
Қирғизистон Ташқи ишлар вазирлиги Консуллик департаменти директори ўринбосари Бақит Қодиров “Биринчи радио” телеканали эфирида махсус баёнот эълон қилиб, Россияда қирғиз мигрантлари сони қисқариши ҳақидаги хабарни тасдиқлаган. Баёнотга кўра, ҳозирда Россияда 411 мингга яқин Қирғизистон меҳнат муҳожирлари ишламоқда.
Манбада айтилишича, 2022 йилда Россияда 836 мингдан ортиқ қирғиз мигрантлари ишлаган. 2023 йилда эса уларнинг сони 651 минггача қисқарган.
Меҳнат, аҳолини ижтимоий муҳофаза қилиш ва миграция вазирлиги ҳузуридаги миграция сиёсати бош бошқармаси бошлиғи Эркин Каримов муҳожирларнинг ўз ватанига қайтишига сабабчи бўлаётган омилларни санаб ўтган. Унга кўра дунёдаги беқарор геосиёсий вазият ва қониқарсиз иш ҳақи фуқароларни ортга қайтишга мажбур қилмоқда.
Маълумот ўрнида, Ўзбекистон президенти идораси матбуот котиби Шерзод Асадов олдинроқ “Севимли” телеканали журналистига берган интервьюсида Россиядаги ўзбек меҳнат муҳожирлари ҳозирда 1 миллион нафарни ташкил этиши ҳақида хабар қилган эди. Россия президенти Владимир Путиннинг Тошкентга ташрифи пайтида ҳам Москвадаги ҳукумат раҳбари маълумотни тасдиқлаган.
Статистик маълумотлар 2016 йилгача Россия ҳудудида 4 миллион атрофида ўзбек меҳнат муҳожирлари фаолият юритганини кўрсатган. Айрим норасмий манбалар муҳожирлар сонини 2016 йил учун ҳаттоки 6 миллион атрофида деб белгилаган.
“Мана шу кўрсаткичнинг ўзи ҳам мамлакатимизда амалга оширилаётган иқтисодий ислоҳотлар самарасини кўрсатади, деб биламан”, — деган Шерзод Асадов.
Изоҳ (0)