Ўзбекистон президенти Шавкат Мирзиёев 8 май куни Москва шаҳрида бўлиб ўтган Олий Евросиё иқтисодий кенгаши мажлисида нутқ сўзлади. Бу ҳақда Президент матбуот хизмати хабар берди.
Давлат раҳбари сўзининг аввалида Россия президенти лавозимига киришгани муносабати билан Владимир Путин номига йўлланган самимий қутловлар ва эзгу тилакларга қўшилишини билдирди.
Сайловчилар юқори фаоллик билан иштирок этган мазкур сайловларда эришган ишончли ғалабангиз кўпмиллатли Россия халқининг Сизга бўлган юксак ишончини, Сиз олиб бораётган сиёсат ва мамлакатни модернизация қилиш бўйича амалга оширилаётган кенг кўламли дастурларни қатъий қўллаб-қувватлашини яна бир бор намоён этди.
Сизга келгусида янада улкан муваффақиятлар тилайман.
Ушбу мажлисда иштирок этаётган барча ҳамкасбларимизни муҳим сана – фашизм устидан қозонилган Буюк Ғалабанинг 79 йиллиги ҳамда Евросиё иқтисодий иттифоқи ташкил этилганининг ўн йиллиги билан қутлайман.
Бугун тонгда Москвага учишдан олдин мен Иккинчи жаҳон урушида қатнашган фахрийларимиз билан учрашдим. Минг афсуски, уларнинг сони йилдан йилга камайиб бормоқда. Улар сизлар орқали уруш ва фронт ортида меҳнат қилган барча фахрийларга самимий табрикларини, биродар халқларимизга тинчлик, фаровонлик ва равнақ сўраб, билдирган тилакларини етказишни илтимос қилишди.
Сизларга улкан мамнуният билан фахрийларимизнинг илтимосини етказаман.
Ҳурматли мажлис иштирокчилари!
Ҳозиргина ҳамкасбларимнинг нутқларида дунёдаги бугунги мураккаб вазиятга баҳо берилди, замонавий таҳдидларни бартараф этиш учун ҳамкорликни янада кенгайтириш зарурлиги таъкидланди.
Юзага келган ҳозирги шароитда мамлакатларимиз ўртасидаги савдо-иқтисодий алоқаларни қўллаб-қувватлаш ва рағбатлантириш, кооперация лойиҳаларини илгари суриш ҳамда ўзаро инвестицияларнинг ўсиши учун шароит яратиш биринчи даражадаги вазифа, деб ҳисоблайман.
Ўтган ойда Тошкентда муваффақиятли ўтган анъанавий “Иннопром” халқаро кўргазмаси бундай ҳамкорликка ёрқин мисолдир. Кўргазмада мамлакатларимизнинг икки мингдан ортиқ етакчи корхоналари қатнашди, янги кооперация лойиҳалари бўйича юзлаб келишувларга эришилди.
Бугунги кунда ушбу халқаро форум Ўзбекистоннинг Россия ва Евросиё иқтисодий иттифоқига аъзо бошқа давлатлар билан бизнес соҳасидаги мулоқотларини ривожлантиришда самарали платформага айланди. Биз ушбу мулоқот майдонини янада кенгайтириш, иштирокчилар сонини ошириш, жумладан, Куба, Эрон, Миср, Бирлашган Араб Амирликлари, Мўғулистон, Вьетнам ва Индонезия каби ҳамкор мамлакатлар компанияларини бу жараёнга жалб этиш ниятидамиз.
Умуман, Ўзбекистоннинг Евросиё иқтисодий иттифоқида кузатувчи мақомидаги уч йиллик ҳамкорлиги даврида ўзаро товар айирбошлаш ҳажми 60 фоизга ошди. Бунга, авваламбор, саноат маҳсулотларини етказиб беришни кўпайтириш ҳисобидан эришилди. Айни вақтда миллий валюталардаги ҳисоб-китоблар улуши ортиб бормоқда.
Мингдан зиёд қўшма корхона ва лойиҳалар ишга туширилди. Юк ташиш ҳажми ўсмоқда, мунтазам авиақатновлар сони икки баробар кўпайди.
Евросиё иқтисодий комиссияси билан биргаликда юқори даражадаги Ишчи гуруҳнинг учта йиғилиши ўтказилди, Қўшма ҳамкорлик режасидаги тадбирлар тўлиқ амалга оширилди.
Биз, шунингдек, савдо ва юк ташишни рақамлаштириш, электрон тижорат, иқлим ўзгариши соҳаларидаги тармоқларга оид лойиҳа ва дастурларга ҳам қўшилдик.
Муҳтарам ҳамкасблар!
Мамлакатимизнинг Евросиё иқтисодий иттифоқи билан ўзаро манфаатли ҳамкорлигининг устувор йўналишлари ҳақида қисқача тўхталиб ўтишга рухсат бергайсиз.
Биринчидан, Ўзбекистон ЕИИни ривожлантиришнинг стратегик йўналишлари доирасида амалий шерикликни кенгайтириш ва тармоқларда кўп томонлама ҳамкорлик лойиҳаларини амалга оширишда янада фаол иштирок этишдан манфаатдор.
Шу муносабат билан Ўзбекистон Республикаси Ҳукумати ва Евросиё иқтисодий комиссияси ўртасида ўрта муддатдаги истиқболга мўлжалланган Қўшма тадбирларнинг янги комплекс режасини тайёрлашни таклиф этамиз.
Ишончим комилки, кузатувчи давлатларнинг лойиҳаларда тўлақонли иштирок этишини тартибга соладиган механизмнинг тезроқ қабул қилиниши ушбу ҳужжатни самарали амалга оширишга хизмат қилади.
Иккинчидан, Евросиё иқтисодий иттифоқига аъзо мамлакатлар билан ўзаро савдо-сотиқдаги тўсиқ ва чекловларни биргаликда бартараф этишга тайёр эканимизни тасдиқлаймиз.
2009 йилда қабул қилинган Товарлар ишлаб чиқарилган мамлакатни аниқлаш қоидаларига Ўзбекистоннинг қўшилиш жараёни бошланди.
Божхона чегараларимиз орқали олиб ўтиладиган товар ва транспорт воситалари ҳақидаги маълумотларнинг электрон алмашинувини йўлга қўйиш, санитария, фитосанитария ва ветеринария назорати борасидаги ахборот тизимларини интеграция қилиш, техник жиҳатдан тартибга солиш чораларини ўзаро мослаштириш ва электрон сертификатлашни қўллаш режасини қабул қилиш ушбу йўналишдаги аниқ амалий қадамлар бўлиши мумкин.
Учинчидан, Жанубий ва Жануби-Шарқий Осиё, Яқин Шарқ мамлакатлари бозорлари билан боғловчи Шимол–Жануб транспорт йўлагини ривожлантириш бўйича яқин мулоқотни давом эттириш муҳимдир.
Шу борада транспорт идоралари раҳбарларининг Термиз шаҳрида апрель ойида бўлиб ўтган Беларусь – Россия – Қозоғистон – Ўзбекистон – Афғонистон – Покистон мултимодал маршрутини ривожлантириш бўйича биринчи учрашуви самарали бўлганини мамнуният билан таъкидлаймиз.
Мамлакатларимиз ўртасида транзитга доир тартиб-таомилларни соддалаштириш мақсадида жорий этилаётган ЕИI божхона транзитининг ягона тизими билан Рақамли ҳамкорлик бўйича комплекс чора-тадбирларни ишлаб чиқиш тарафдоримиз.
Тўртинчидан, саноат кооперацияси соҳасидаги лойиҳалар ва талаб юқори бўлган маҳсулотлар ишлаб чиқаришни маҳаллийлаштириш дастурларини келгусида ҳам фаол қўллаб-қувватлашни мақсад қилганмиз.
Бу йўналишда, мамлакатларимиз ҳудудларида биргаликда яратилаётган саноат зоналари ва технопаркларда янги қувватларни жойлаштиришни назарда тутган ҳолда, алоҳида “йўл харитаси”ни ишлаб чиқишни таклиф қиламан. Бундай лойиҳаларга бизнесни кенг жалб этиш масалаларини жорий йилда Самарқандда бўлиб ўтадиган Ўзбекистон савдо-саноат палатаси ва ЕИI Ишбилармонлик кенгашининг биринчи учрашувида кўриб чиқиш мумкин.
Бундан ташқари, Бирлашма доирасида саноат кооперацияси дастурларини қўллаб-қувватлаш бўйича махсус механизм имкониятларидан фойдаланишдан ҳам манфаатдормиз.
Бешинчидан, қуйидаги муҳим йўналишларда ишларни тизимли йўлга қўйиш ва Евросиё иқтисодий иттифоқи органлари билан ҳамкорликни кенгайтириш зарурлигини алоҳида таъкидлаб ўтмоқчиман.
— Евросиё Агроэкспрессини ривожлантириш, “яшил” ва сувни тежайдиган технологияларни жорий этиш, қўшма агросаноат кластерлари ва логистика марказларини ташкил этишни қўллаб-қувватлаш;
— иқлим ўзгаришининг салбий оқибатларини бартараф этиш масалаларида умумий ёндашувларни ишлаб чиқиш ва яқин ҳамкорлик қилиш. Бунда тегишли Ишчи гуруҳининг навбатдаги мажлисларидан бирини Ўзбекистонда ўтказишни таклиф этамиз;
— мамлакатларимизда меҳнат мигрантлари фаолияти учун рақамли платформаларга уланган ҳолда, қулай шароит ва ижтимоий кафолатларни шакллантириш;
— сайёҳлар алмашинувини кескин оширишга қаратилган қўшма туристик дастур ва маҳсулотларни ишлаб чиқиш.
Ушбу йўналишларнинг барчаси ҳамкорликнинг ўрта муддатдаги истиқболга мўлжалланган янги Режасида ўз аксини топиши мумкин, деб ҳисоблайман.
Ҳурматли делегациялар раҳбарлари!
Сўзимнинг якунида Россия Федерацияси президенти ҳурматли Владимир Владимирович Путинга анъанавий дўстона ва илиқ қабул учун самимий миннатдорлик билдираман.
Ишончим комилки, ушбу учрашувимиз натижалари ўзаро манфаатли ҳамкорликни кенгайтиришга хизмат қилади, мамлакатларимиз ва халқларимиз ўртасидаги дўстлик ва шерикликни мустаҳкамлаш йўлида яна бир амалий қадам бўлади.
Эътиборингиз учун раҳмат.
Изоҳ (0)