Исроил ҳарбий-ҳаво кучлари Суриядаги 250 дан ортиқ ҳарбий объектга зарба берди.
“Бу ҳаво кучлари тарихидаги энг йирик зарба бериш операцияларидан бири бўлди”, дейилади хабарда.
Қайд этилишича, Исроил армиясининг нишонлари орасида Сурия президенти Башар Асаднинг армия базалари ҳам бўлган. Ўнлаб қирувчи самолётлар, ўнлаб ерусти самолётлари, ҳаво-ракета комплекслари, ишлаб чиқариш майдонлари ва ракета омборлари зарар кўрган.
Суриялик ҳуқуқ ҳимоячилари Исроилнинг Латакияга зарба берганини маълум қилди
Лондонда жойлашган Сурия инсон ҳуқуқлари кузатув кенгаши (SOHR) Асад ағдарилганидан буён Исроил Сурия ҳудудига қарийб 250 та ҳаво зарбаси берганини тасдиқлади. Ҳуқуқ ҳимоячиларининг маълумотларига кўра, Исроил армияси “Суриядаги энг муҳим ҳарбий объектларни йўқ қилган”.
“Жумладан, аэропортлар, қурол-яроғ ва ўқ-дори омборлари, шунингдек, ҳарбий тадқиқот марказлари ҳақида сўз бормоқда”, деб таъкидланади баёнотда.
SOHR’нинг қайд этишича, зарбалар Суриянинг турли вилоятларида, хусусан, Дайр аз-Зор, Ҳама ва Хомс вилоятларида, Дамашқда, ҳамда Россия ҳарбий базалари жойлашган Латакияда амалга оширилган. Исроил Латакия порти яқинидаги ҳаво мудофааси объектига ҳужум қилган, бунда Сурия ҳарбий-денгиз кучлари кемаларига зарар етказилган.
AFP 10 декабрь куни эрта тонгда Дамашқда кучли портлашлар эшитилгани ҳақида хабар берди.
Суриядаги вазият
Ноябрь ойи охирида қуролли исёнчилар Сурия шимолий қисмига юришни бошлади. Улар Идлиб вилоятини, мамлакатдаги аҳоли сони бўйича иккинчи ўринда турувчи Ҳалаб шаҳрини, Хама ва Хомс вилоятлари ҳудудларининг бир қисмини ўз назоратига олди. Шундан сўнг Дамашққа кирди. Президент Башар Асад оиласи билан мамлакатни тарк этди.
Россия Ташқи ишлар вазирлиги Башар Асад исёнчилар билан келишувга эришиб, истеъфога чиқишга рози бўлгани, шундан кейин Сурияни тарк этгани ҳақида маълумот берди. Исёнчилар Асадни қўлга олишда ёрдам берадиган маълумот учун 10 миллион доллар ваъда қилган.
Сиёсатчи мамлакатни тарк этганидан кейин исёнчилар Асад қароргоҳига бостириб кирган, одамлар буюмларни талон-торож қилган. Қароргоҳдаги гаражда BMW, Audi, Ferrari, Lamborghini Diablo каби 50 га яқин ҳашаматли ва қимматбаҳо автомобиллар аниқланган.
Кечроқ Кремлдаги манбалар Суриядан қочган президент оиласи билан Москвага келгани, Путин уларга бошпана берганини маълум қилди.
Изоҳ (0)