Сурия президенти Башар Асаднинг режими исёнчилар ҳужуми натижасида қуласа, Россия Ўрта Ер денгизидаги ягона ҳарбий базасини йўқотади. Бу Россиянинг Украинадаги саъй-ҳаракатлари учун кескин оқибатларга олиб келиши мумкин, деб ёзмоқда The Telegraph ҳарбий шарҳловчиси Девид Акс.
Суриядаги исёнчилар аллақачон мамлакатнинг энг йирик шаҳри Ҳалабни эгаллаб, муҳим Ҳама шаҳрига яқинлашган. Агар ҳукуматга қарши кучлар Ҳамани эгалласа, улар Латакияга ҳужум қилиш имкониятига эга бўлади. У ерда Ўрта Ер денгизидаги Россия флотининг ягона базаси жойлашган.
Москва бу базадан 1970 йиллардан бери фойдаланмоқда. 2017 йилда Россия ва Сурия 49 йиллик шартнома имзолаган. Бу эса Москвага Тартус шаҳридаги базага янада кенгроқ кириш имконини берди. Айнан шу ердан Украинага кенг кўламли босқин олдидан бир нечта рус кемалари Қора денгизга келган.
Тартусни йўқотиш Россиянинг Жанубий Европа ва Шимолий Африкадаги куч-қудратини намоён этиши учун фожиали бўларди. Аслида, Кремль учун Тартусдаги ҳаётий муҳим қирғоқ инфратузилмасини ўрнини босишнинг ягона йўли — Босфор орқали Ўрта Ер денгизига чиқишни қайта тиклашдир, деди Девид Акс.
Туркия уруш бошланганидан кейин бўғозларини ёпгани сабабли Россия кемалари Қора денгизга кира олмайди. Акснинг фикрича, Тартусни йўқотгач, Кремль олдида оғир танлов пайдо бўлиши мумкин: Украинада урушни давом эттириш ва Ўрта Ер денгизи минтақасидаги таъсирини йўқотиш, ёки Украина билан келишувга эришиш ва ўз ҳарбий-денгиз кучлари учун турк бўғозларини қайта очиш.
Суриядаги вазият
Исёнчиларнинг Ҳалаб провинцияси ғарбий қисмида ҳукумат кучларига қарши кенг кўламли ҳужуми 27 ноябрь куни бошланди. Икки кундан сўнг улар 2016 йилдан бери биринчи марта Ҳалаб шаҳрига кирди. Ҳужумга Суриядаги фуқаролар уруши даврида Асадга қарши чиққан “Ҳаёт Таҳрир аш-Шам” террорчилик ташкилоти бошчилик қилди.
30 ноябрь куни Сурия армияси Ҳалабдан “қўшинларни вақтинча олиб чиқиб кетиши”ни эълон қилди. Аммо Асад Сурия “дўстлари ва иттифоқчилари ёрдамида террорчиларни йўқ қилишга қодир”лигини ишонч билан таъкидлаб, терроризмни йўқ қилишни “минтақадаги барқарорлик ва хавфсизлик” гарови деб атади.
Сурия президенти Башар Асад мамлакатдаги вазият юзасидан Исроилдан ёрдам сўради. Мурожаат Асаднинг Европадаги ёрдамчиларидан бири орқали Исроил томонига етказилган. Ушбу сўровга яҳудий давлати танқидий жавоб берган. Жумладан, Исроил ҳукумати Суриядаги вазият уларни ташвишга солмаслигини айтиб, “аввало Суриядан Эронпараст кўнгиллиларни олиб ташлаш, сўнгра ёрдам сўраш” кераклигини маслаҳат берган.
Изоҳ (0)