Саудия Арабистонининг Ар-Риёд шаҳрида 21 декабрь куни профессионал бокс оқшоми ташкил этилади.
Турнирнинг иккинчи асосий жангида супер ярим ўрта вазн тоифасида ўзбекистонлик собиқ жаҳон чемпиони Исроил Мадримов Украина вакили Сергей Богачукка қарши рингга чиқиши керак эди.
Бироқ Саудия Арабистони кўнгилочар бошқармаси раҳбари Турки ал аш-Шайхнинг Х (собиқ Twitter) ижтимоий тармоғида маълум қилишича, Мадримов ўткир бронхит туфайли мазкур жангда иштирок эта олмайди.
Унинг ўрнини 21 декабрь куни англиялик Ишмаэл Дэвис эгаллайди.
Аввалроқ Мадримов асосий эътибор айнан Богачукка қарши жангга қаратилганини қайд этган эди.
Исроил энди 2025 йилнинг 22 февраль куни Вержил Ортис билан жанг қилади.
Маълумот учун, 29 ёшли Исроил Мадримов ҳозирга қадар 12 та жанг ўтказиб, 10 та ғалаба, 1 та мағлубият ва 1 та дуранг қайд этган. 26 ёшли Вержил Ортис Жуниор ҳисобида эса 22 та ғалаба бор. У сўнгги жангида Мадримовнинг бўлажак рақиби Богачукни очколар ҳисобига кўра таслим этганди.
Изоҳ (0)