Исроилнинг Ҳалаб (Сурия) яқинида уюштирган ҳаво ҳужумлари оқибатида мамлакатга маслаҳатчи сифатида юборилган Эрон Ислом инқилоби қўриқчилари корпуси расмийси ҳалок бўлди. Бу ҳақда Эрон оммавий ахборот воситаларига таяниб, CNN хабар берди.
Марҳум Саид Абяр 3 июнь куни уюшитирилган ҳаво ҳужумида ҳалок бўлган. У апрель ойида Исроил Дамашқдаги Эрон элчихонасини бомбардимон қилганидан кейин яҳудий давлати томонидан ўлдирилган биринчи эронлик ҳисобланади. Саид Абяр Эроннинг Қудс кучлари аъзоси ҳисобланиб, 2012 йилдан бери Сурияда бўлган.
Исроил авиациясининг июнь ойи бошида Сурияга уюштирган ҳужумида 17 киши ҳалок бўлди, 15 киши яраланди. Қурбонлар орасида ироқликлар, сурияликлар ва “Ҳизбуллоҳ” аъзолари бўлган, дея хабар беради Сурия инсон ҳуқуқлари обсерваторияси. Ҳужум нишони мис заводи ва қурол омбори бўлгани айтилмоқда.
Сурияда 2011 йилда фуқаролар уруши бошланганидан буён Эрон Сурия президенти Башар ал-Асадни қўллаб-қувватлаш учун ҳарбий маслаҳатчиларини жўнатди. Исроил сўнгги йилларда Суриядаги Эрон ва “Ҳизбуллоҳ” нишонларига бир неча бор зарбалар берган.
Эслатиб ўтамиз, 1 апрель куни Исроил Дамашқдаги Эрон консуллигига авиазарба берганди. Ҳужум оқибатида 11 киши, жумладан, 2016 йилгача Ливан ва Суриядаги “Қудс” элита кучларига раҳбарлик қилган Эрон ҳарбий маслаҳатчиси генерал Муҳаммад Ризо Зоҳидий, унинг ўринбосари генерал Муҳаммад Ҳоди ҳожи Раҳимий ва яна беш эронлик зобит ҳам ҳалок бўлганди. Шунингдек, уч нафар Сурия ва бир нафар Ливан фуқароси вафот этган.
Бунга жавобан 14 апрель куни Эрон тунда 300 дан ортиқ дрон, қанотли ва баллистик ракеталар билан Исроилга ҳужум қилганди. Исроил армияси мамлакатга яқинлашган ракета ва дронларнинг 99 фоизи Arrow узоқ масофали ракетага қарши мудофаа тизими ва қирувчи самолётлар томонидан йўқ қилинганини таъкидлаган. Эрон ҳарбий штаб-квартираси ҳужумни “муваффақиятлироқ” деб атаган ва жавоб ҳужуми бўлган тақдирда “каттароқ куч билан” зарба беришни ваъда қилган.
Изоҳ (0)