Исроил армияси ярим асрдан кўпроқ вақт ичида биринчи марта Сурия ҳудудига Голан тепаликлари чегарасидан кирди. Бу ҳақда икки нафар исроиллик амалдорга таяниб The New York Times (NYT) хабар берди.
“Дам олиш куни Исроилнинг қуруқликдаги қўшинлари демилитаризация зонасидан чиқди, бу уларнинг 1973 йилги Октябрь урушидан бери Сурия ҳудудига биринчи очиқ бостириб кириши бўлди”, дейилади хабарда.
Расмийларнинг сўзларига кўра, Тель Авив Сурия қуролли мухолифати аъзолари Голан тепаликлари яқинидаги ҳарбий объектларни назоратга олиб, улардан Исроилга қарши фойдаланиши мумкинлигидан хавотирда.
Исроил армияси вакили аввалроқ Сурия жанубидаги бешта чегарадош аҳоли пункти аҳолисини хавфсизлик мақсадида уйларида қолишга ва кўчага чиқмасликка чақирган эди. Исроилнинг Kan давлат телерадиокомпаниясига кўра, мамлакат армияси 8 декабрь куни Сурия армияси буфер ҳудуддаги ўз позицияларини тарк этганидан сўнг Хермон тоғидаги Сурия постини эгаллаган.
Исроил бош вазири Биньямин Нетаньяху Сурия ҳарбийлари ўз позицияларини тарк этгани сабабли 1973 йилги “Қиёмат куни”дан кўп ўтмай Голан тепаликларида Дамашқ билан кучларни ажратиш тўғрисидаги келишув ўз кучини йўқотганини айтган эди. Шу муносабат билан Исроил армиясига чегара ҳудудини ва уни назорат қилувчи позицияларни эгаллаш ҳақида буйруқ берган.
Исроил Сурия президенти Башар Асад ҳокимиятининг қулаши ва мамлакатнинг катта қисмини қуролли мухолифат кучлари босиб олиши фонида Голан тепалигидаги мудофаасини фаол равишда мустаҳкамламоқда.
8 декабрь куни Суриядаги қуролли мухолифат вакиллари мамлакат устидан назорат ўрнатганини эълон қилди. Сурия бош вазири Муҳаммад Ғози ал-Жалилий мамлакатда бир нечта вазир билан қолишини айтди, у мухолифат раҳбарияти билан алоқа ўрнатди.
Россия ТИВ хабарига кўра, Сурия президенти Башар Асад бир қатор можаро иштирокчилари билан музокаралардан сўнг лавозимини тарк этишга қарор қилган ва ҳокимиятни тинч йўл билан топшириш бўйича кўрсатма бериб, мамлакатни тарк этган.
Кейинроқ Кремлдаги манба Асад ўз оила аъзолари билан Москвага келгани, Россия уларга инсонпарварлик нуқтайи назаридан бошпана бергани ҳақида хабар берган. Шунингдек, Москва Сурия ҳудудида Россиянинг ҳарбий базалари ва дипломатик муассасалари хавфсизлигини кафолатлаган Сурия қуролли мухолифати вакиллари билан алоқада бўлиб туришини айтган.
Голан тепаликлари 1967 йилгача Сурияга тегишли бўлган. Олти кунлик уруш давомида Исроил қўшинлари бу ҳудудни эгаллаб олган, 1973 йилги “Қиёмат куни” уруши якунлари бўйича томонлар ярашиш ва қўшинларни ажратиш тўғрисида битим тузган. 1974 йилда минтақада БМТ тинчликпарвар постлари пайдо бўлган. Чегара чизиғи Сурия томонидан “Браво”, Исроил томонидан эса “Алфа” деб номланган.
Изоҳ (0)