Warner Bros. шўба корхонаси Wayne Enterprises ва Action Vehicle компаниялари ҳамкорликда Кристофер Ноланнинг “Бэтмен” трилогияси юлдузига айланган Бэтмобиль Tumbler машинасини ишлаб чиқаради. Бу ҳақда Europa Plus хабар бермоқда.
Tumbler автомобили жами 10 та чекланган нусхада яратилади ва уларнинг ҳар бири 3 миллион долларга баҳоланади. Машина 525 от кучига эга бўлиб, габаритлари ҳайратда қолдиради: машинанинг узунлиги 4,65 метр, кенглиги 2,82 метр, баландлиги 1,52 метр.
Ишлаб чиқарувчиларнинг таъкидлашича, Бэтмобиль Chevrolet Camaro’нинг 6,2 литрли Powertrain LS3 двигатели билан жиҳозланган. Машинанинг ташқи томони углеродли қоплама, мустаҳкам металл ва турли ҳароратга бардошли кевлар материали билан қопланган. Автомобиль салони кондиционер, GPS ва беш нуқтали хавфсизлик камарлари билан жиҳозланган.
Ҳар бир машинага студия томонидан ҳақиқийлиги бўйича махсус сертификат берилади. Бироқ автомобиль одатий йўллар ва трассаларда ҳаракатланиш учун рухсатномага эга эмас. Tumbler ноёб дизайни туфайли умумий фойдаланишдаги йўлларга мўлжалланмайди. Машина эгалари ўзларига тегишли ёпиқ ҳудудларда автомобилни ҳайдашлари мумкин. Шунингдек, Бэтмобиль фильм каби функсионал пулемётлар ва реактив двигатель билан жиҳозланмаган.
“10 та Wayne Enterprises Tumblers машиналари — Бэтмобиллар фақатгина махсус таклифнома билан сотилади. Ушбу коллексион машиналар Warner Bros. томонидан расман тасдиқланган бўлиб, фақатгина қимматбаҳо автомобиллар иштиёқмандлари бўлган автоколлексионерлар учун сотилади”, дейилади расмий сайтда.
Изоҳ (0)