2023 йилнинг 24 декабрь куни ўзбек кино ихлосмандларига “Муҳташам юз йил”, “Севги изтироби”,“Чолиқуши” (2013 йил) сериаллари, “Менинг акам” фильми билан танилган турк юлдузи Бурак Ўзчивит 39 ёшни қарши олди. Қуйида нафақат Туркия, балки дунёнинг кўплаб мамлакатларида ўз мухлисларига эга актёрнинг ҳаёт ва ижод йўлига назар ташлаймиз.
Болалик йиллари
Бурак Ўзчивит 1984 йилда Туркиянинг Мерсин шаҳрида дунёга келган. Отаси Бюлент Ўзчивит кичик ресторан эгаси, онаси Жейҳан эса Бурак ва унинг опаси Буржун тарбияси билан машғул бўлган. Болалигидан оғир-босиқ феъл атвор эгаси бўлган Буракнинг энг севимли машғулоти соатлаб мультфильм томоша қилиш бўлган. У суперқаҳрамонларни жуда ҳам яхши кўрган ва атрофдагиларига катта бўлса, “Бэтмен” бўлишини таъкидлаган. Кейинчалик дўстлари билан вақт ўтказиш, хусусан, футбол ўйнаш ва спорт залда шуғулланишни канда қилмаган.
Мактабни битиргач Бурак Мармара университетида тасвирий санъат ва кино йўналишида таълим олиш билан бирга подиумларда модел сифатида чиқиш қила бошлаган. 2006 йилга қадар Туркиянинг энг талабгир моделларидан ҳисобланган. 2003 йилда 17 ёшли Бурак “Туркиянинг энг яхши модели” танловининг мутлақ ғолиби, шунингдек, “Дунёнинг энг яхши модели” танловида иккинчи ўрин соҳиби бўлган.
Карьера
Ўсмирлар ҳаёти ҳақидаги “Минус 18” триллеридаги кичик иштироки унинг актёрлик карьерасидаги илк роли бўлган. Ушбу фильмдан кўп ўтмай “Оилавий уй” кинокомедияси, “Сотқинлик” психологик драмасида ва “Кичик сирлар” фильмида роль ижро этади. “Муҳташам юз йил” тарихий-биографик сериалдаги Малкачўғлу Балибей роли унга катта муваффақият олиб келган бўлса, “Чолиқуши” фильмининг янги талқинидаги Камрон образи билан у бутун дунёга машҳур бўлди.
Ушбу фильмдан кейин у режиссёрлардан суратга тушиш учун таклифни узоқ кутишига тўғри келмаган. Чунки дунёнинг турли нуқталаридаги мухлислар Бурак иштирок этган фильмларни қайта-қайта сўрай бошлаган. Шундан кейин “Севги сенга ўхшайди” мелодраммасида иштирок этган.
2015 йилни эса актёр карьерасидаги энг омадли йиллардан деб ҳисобласа бўлади. Негаки айнан шу йили бутун дунёдаги томошабинлар севиб томоша қилган, ўзбек телеканалида “Севги изтироби” номи билан эфирга узатилган “Кара севда” сериали суратга олинган. Романтик фильмда Бурак Неслиҳан Атагул билан севишганлар ролини ижро этиб, мухлислар, айниқса қизлар меҳрига сазовор бўлган.
“Севги изтироби”даги жуфтликнинг ҳаётда муносабатлари қандай экани кино томошабинларини энг кўп қизиқтирган савол ҳисобланади. Интернетда уларнинг муносабатлари қай даражадалиги билан боғлиқ миш-мишларни-ку айтмаса ҳам бўлаверади. Факт эса шуки, сериалдаги воқелик ва экран ортидаги реаллик тубдан фарқ қилади. Бурак ва Неслиҳанни фаолияти билан боғлиқ зўраки алоқалар боғлаб турган. Дўстона бошланган муносабатлардан кейинчалик асар ҳам қолмаган.
Шахсий ҳаёт
Ўзчивит 2014 йилга қадар машҳур турк журналистининг қизи, фотомодель Жейлан Чапа билан жиддий муносабатда бўлган, бироқ Жейланнинг асоссиз рашки туфайли жуфтлик ажрашган. Маълум бўлишича, Жейланнинг турли гумонлар сабаб суратга олиш майдончасига бостириб келиши, ишонмаслиги актёрни асабийлаштирган.
“Чолиқуши” сериалининг суратга олиш ишлари бошланганда актёр бўлажак рафиқаси Фахрие Эвжан билан танишади. “Севги сенга ўхшайди” мелодраммасида биргаликдаги иштироки вақтида улар орасида илиқ муносабатлар пайдо бўла бошлайди.
Фахрие ўзига яраша қайсар феъл-атворга эга бўлишига қарамай, Буракга нисбатан сабрли ва оғир-босиқ муносабатда бўлган. Журналистлар билан бўлган суҳбатда у ўзига ёқмаган тақдирда ҳам Буракнинг одатларига қаршилик билдирмаслигини, инсоннинг қандайлигини билиб туриб танлов қилгач, уни ўзгартиришга уриниш мантиққа тўғри келмаслигини таъкидлаган.
Ўзчивит орадан кўп ўтмай Фахриени ота-онаси билан таништирган ва улар 2017 йилнинг 29 июнь куни турмуш қурган. Жуфтлик шов-шувли маросим хоҳламаган, лекин машҳур юлдузлар тантанаси шунчаки ўтиб кетмаслиги аниқ эди.
Тўй маросими Босфор соҳили бўйидаги Саит Ҳалим Паса вилласида бўлиб ўтган. Ташриф буюрган меҳмонларнинг ўша заҳотиёқ улашган Instagram’даги жонли эфирлари, фото ва видеолари жуфтлик мухлислари севимли кумирларининг бахтли куни қандай ўтаётганини виртуал кузатишига сабаб бўлган. Келин ва куёв тўйдан сўнг Мальдив оролларига жўнаб кетган. Улар 2019 йилнинг 13 апрелида ўғил фарзандли бўлди ва унга Каран деб исм қўйишди.
Шахсий ҳаётини кўз-кўз қилишни ёқтирмайдиган ёш оила фарзанди дунёга келганидан саккиз ой ўтиб ўғлининг суратини оммага намойиш қилди. Жуфтлик 2023 йилнинг январь ойида яна бир ўғил фарзандли бўлишди. Чақалоққа Керем деб исм қўйилган.
Буракнинг Ўзбекистонга ташрифлари
Бурак Ўзчивит Ўзбекистонга илк марта 2019 йилнинг февралида келган эди. Ўшанда актёр Тошкентга айнан мухлисалари билан зиёфатда иштирок этиш учун келган.
Улар орасида Ўзбекистондаги нуфузли шахсларнинг рафиқалари, бизнес-ледилар, модель бизнеси вакилалари ҳам бўлган.
Хабарларга кўра, ўз истеъдодини қадрловчи аёллар билан 2,5 соатлик мулоқоти эвазига у 2 миллион турк лираси (қарийб 380 минг доллар) пул ишлаб олган.
Актёр Ўзбекистон унга жуда ёққанини, у ерда кўплаб хушмуомала ва меҳмондўст кишиларни учратгани, шу сабабли албатта у ерга қайтиб боришини айтган.
Буракнинг Ўзбекистонга иккинчи ташрифи 2022 йилнинг сентябрь ойида кузатилди. Турк актёри Тошкент халқаро кинофестивалида иштирок этиш учун пойтахтга келди.
Изоҳ (0)