Warner Bros. sho‘ba korxonasi Wayne Enterprises va Action Vehicle kompaniyalari hamkorlikda Kristofer Nolanning “Betmen” trilogiyasi yulduziga aylangan Betmobil Tumbler mashinasini ishlab chiqaradi. Bu haqda Europa Plus xabar bermoqda.
Tumbler avtomobili jami 10 ta cheklangan nusxada yaratiladi va ularning har biri 3 million dollarga baholanadi. Mashina 525 ot kuchiga ega bo‘lib, gabaritlari hayratda qoldiradi: mashinaning uzunligi 4,65 metr, kengligi 2,82 metr, balandligi 1,52 metr.
Ishlab chiqaruvchilarning ta’kidlashicha, Betmobil Chevrolet Camaro’ning 6,2 litrli Powertrain LS3 dvigateli bilan jihozlangan. Mashinaning tashqi tomoni uglerodli qoplama, mustahkam metall va turli haroratga bardoshli kevlar materiali bilan qoplangan. Avtomobil saloni konditsioner, GPS va besh nuqtali xavfsizlik kamarlari bilan jihozlangan.
Har bir mashinaga studiya tomonidan haqiqiyligi bo‘yicha maxsus sertifikat beriladi. Biroq avtomobil odatiy yo‘llar va trassalarda harakatlanish uchun ruxsatnomaga ega emas. Tumbler noyob dizayni tufayli umumiy foydalanishdagi yo‘llarga mo‘ljallanmaydi. Mashina egalari o‘zlariga tegishli yopiq hududlarda avtomobilni haydashlari mumkin. Shuningdek, Betmobil film kabi funksional pulemyotlar va reaktiv dvigatel bilan jihozlanmagan.
“10 ta Wayne Enterprises Tumblers mashinalari — Betmobillar faqatgina maxsus taklifnoma bilan sotiladi. Ushbu kolleksion mashinalar Warner Bros. tomonidan rasman tasdiqlangan bo‘lib, faqatgina qimmatbaho avtomobillar ishtiyoqmandlari bo‘lgan avtokolleksionerlar uchun sotiladi”, deyiladi rasmiy saytda.
Izoh (0)