Профессионал грим ва пардоз усталари фильмларда мўжизалар яратиб келган. Мураккаб грим ва протезларда ишлаш ва рол ижро этиш эса актёрлар учун доим ҳам осон бўлмаган. Қуйида машҳур фильмларда унутилмас образларни гавдалантиришда грим туфайли жиддий қийинчиликка дуч келган актёрларни кўриб чиқамиз.
“Гарри Поттер ва махфий ҳужра” — Эмма Уотсон
Гарри, Рон ва Гермиона Слизериндаги душманлар найрангини фош этиш мақсадида қиёфани ўзгартирувчи сеҳрли ичимлик тайёрлайди. Гарри ва Рон Гойл ва Креб қиёфасига киради. Гермиона эса ўқитувчи Миневра МакГонагалл ўрнига унинг мушуги қиёфасини олади. Тасодифан қўл урган хатоси туфайли у дўстлари билан бирга душман факультетга бора олмайди.
Дастлаб Эмма Уотсоннинг ўзи мушук образида кўрсатилиши лозим эди, бироқ грим ва елим унда кучли аллергик реакция қўзғатди ва қисқа муддатли ролни дублёр ўйнашига тўғри келди.
“Узуклар ҳукмдори” — Бретт Битти
Бретт Битти исмини эшитганда кўпчилик мухлислар унинг “Узуклар ҳукмдори”ига қандай алоқаси бор, дея ҳайрон қолади. Аслида эса актёр Жон Рис-Дэвиснинг дублёри бўлиб, фильмда Дэвисдан ҳам кўпроқ вақт рол ўйнайди. Бретт Битти деярли барча жанговар саҳналарни ижро этган ва суратга олиш мобайнида жуда кўп жароҳатлар олган. Шунингдек, Бретт кунига 12 соатдан ортиқ грим ва юз протезларида юргани сабабли турли травмалар олган. Улардан энг оғири — бош миянинг лат ейиши бўлган. Бундай жароҳат протез ва юз орасидаги бўшлиқда қон тўпланишига, кейин эса у ёрилиб, фавворадек отилишига олиб келган. Бреттнинг сўзларига кўра, реалликда барчаси бундан-да ёмонроқ кўринган эди.
“Дюна” — Стеллан Скарсгард
Стеллан Скарсгард суратга олиш майдонида ўзини аямайдиган актёрлардандир. У “Кариб денгизи қароқчилари” фильмида ирландиялик денгизчи Билл Тёрнер ролини ўйнаган. Унинг таъсирли ташқи кўриниши учун 6 соатли грим меҳнати кетган.
“Дюна” фильмидаги барон Владимир Харконнен роли учун эса актёр 8 соат вақт давомида грим қилинган. Махсус костюмнинг 40 килограмм оғирлиги актёрга нафас олиши ва ҳаракатланишида мураккабликларни келтириб чиқарган. Кейинчалик костюм ичига вентиляция тизими ўрнатилган.
Аммо муаммолар ҳали тугамаган эди. Стеллан қўрқинчли қора суюқликка шўнғиган кадрларда костюм туфайли чўкиб кетишига бир бахя қолган. Сўнг мураккаб гримга яна бир бор ўзгартиришлар киритилган.
“Узуклар ҳукмдори” — Орландо Блум
Британиялик актёр Орландо Блум “Узуклар ҳукмдори” трилогиясидаги эльф Леголас образида томошабинлар ёдида қолган. Сёмка жараёнларида актёр яшил рангли линза тақиб юриши лозим эди, аммо линзалар кўзга ножўя реакция бериб, қизартириб юборган. Фильмда мухлислар Леголас баъзан жигарранг кўзлар билан намоён бўлганини сезиб қолишган. Бундай хатолик актёр шикастланган кўзлари тўлиқ тикланишга улгурмай яна сёмкага қайтгани сабабли юз берган.
“Робот полициячи” — Роберт Жон Берк
Актёр Питер Уэллер “Робот полициячи” нинг учинчи қисмида бош ролни қайта ижро этишдан бош тортганидан сўнг, унинг ўрнига ҳамкасбидан баландроқ актёр Роберт Жон Берк таклиф қилинган. Муаммо шунда эдики, костюм Питер учун махсус ишлаб чиқилган, чўзилмас ва букилмас эди. Бунинг устига, оғирлиги деярли 70 килограмм ва пўлатдан ясалган костюм янги актёрга кўплаб ноқулайликлар туғдирган.
“Бетмен ва Робин” — Арнольд Шварценеггер
Америкалик актёр Арнольд Шварценеггер “Бетмен ва Робин” фильмида жаноб Фриз образини гавдалантирган. 6 соатлик грим ва ноқулай костюмдан ташқари актёр оғиз бўшлиғида кўк рангли чироқ порлаши учун хавфли усулдан фойдаланишга тўғри келган: Шварценеггер оғзига диод фонарлар ўрнатилган, аккумулятордан томган кислота оғизни бир неча марта куйдириб юборган.
“Гарри Поттер ва Азкабан маҳбуси” — Пем Феррис
Фильмда Гаррининг холаси Маржори Дурсл унинг ота-онасини қаттиқ ҳақорат қилади. Бунга чидай олмаган Гарри унга сеҳр қўллайди ва бир неча сонияда Маржори катта шарга айланиб қолади. Кўпчилик ушбу саҳнани компьютер графикаси деб ўйлаган бўлиши мумкин, аммо Пем Феррис ҳақиқий шар костюмини кийиб, рол ўйнаган ва суратга олиш майдонида ҳушидан кетган.
“Гринч — Рождество ўғриси” — Жим Керри
Мазкур оилавий фильм грим мутахассиси эмас, балки визажист рассом томонидан яратилган ажойиб образ намунасидир. Япониялик грим устаси Кадзухиро Цудзи актёр Жим Керрини 8 соат мобайнида макияж қилар эди. Бироқ Керрига узоқ вақт стулда ўтириш ёқмас эди, ҳаттоки актёр суратга олиш майдонини жанжал билан тарк этган пайтлар ҳам бўлган. Бундай муҳитда ишлашни истамаган Кадзухиро ҳам сёмкадан кетиб қолган. Кейинчалик режиссёр Рон Ховард уларни қайтаришга муваффақ бўлган.
Изоҳ (0)