Мазкур фильмларни қизиқиш билан томоша қилган бўлсангиз ҳам, “Дедпул-2” фильмидаги Бред Питт, “Юлдузлар жанги” фильмидаги Дениел Крейгни пайқамаган бўлишингиз мумкин.
“Форрест Гамп”даги Курт Расселл
- АҚШ, 1994 йил.
- Драма, мелодрама.
- Давомийлиги: 2 соат 22 дақиқа.
- IMDb: 8.8.
Форрест Гамп автобус бекатида ўтириб, нотаниш одамларга ҳаётини сўзлаб беради. У болалигидан кўплаб қийинчиликларни енгиб ўтишга мажбур бўлган. Ажабланарлиси шундаки, Форрест ҳар қандай ишни бошласа, унда муваффақиятга эришган: уруш қаҳрамонига айланган, ҳатто стол тенниси бўйича чемпион ҳам бўлган. Аммо барча бу йиллар давомида у биринчи севгисини унутмаган.
Том Ҳэнкснинг ушбу фильмда яратган образини ҳамма эслайди. “Санта-Барбара” сериалининг кўплаб мухлислари эса Робин Райтни бу фильмда кўриб, ажабланган бўлишса керак. Аммо фильмда Курт Рассел ҳам иштирок этган, фақат буни томошабинлар пайқашмаган. Фильмда Элвис Пресли ҳам кўриниш беради — у ўша машҳур рақсини айнан Форрестдан ўрганган. Бутун дунёга машҳур қўшиқчини унча таниқли бўлмаган Питер Добсон ўйнаган, лекин овозини Курт Рассел берган — унинг овози кўпроқ мос келган.
Қизиғи шундаки, “Форрест Гамп” режиссёри Роберт Земекис ва Рассел узоқ вақт давомида буни сир сақлашган ва актёрнинг исмини ҳатто титрларга ҳам киритишмаган. Фақатгина 2016 йилда актёр бу сирни ўзи ошкор қилган.
“Суспирия”даги Тилда Суинтон
- Италия, АҚШ, 2018 йил.
- Даҳшат, триллер.
- Давомийлиги: 2 соат 32 дақиқа.
- IMDb: 6.7.
1977 йилда америкалик раққоса машҳур балет мактабига кириш учун Германияга келади. Уни қабул қилишади, лекин тез орада студияда қандайдир даҳшатли воқеалар содир бўлаётгани маълум бўлади — бу муассасада ишловчи ўқитувчилар қадимги маъбудаларга сиғинувчи жодугарлар экан.
Фильмда Тилда Суинтон бирданига иккита муҳим ролни ўйнаган. Аслида эса актриса учта образда намоён бўлади: Мадам Бланк, Ҳелена Маркос ва доктор Жозеф Клемперер. Суинтонни доктор роли учун ажабтовур пластик грим ёрдамида кекса эркакка айлантиришган. Титрларда ҳам Клемперер ролини “профессионал психоаналитик, проффессор Лутс Эберсдорф ” ижро этгани кўрсатилган.
Бред Питт “Дедпул-2” фильмида
- АҚШ, Канада, 2018 йил.
- Илмий фантастика, ҳаракат, комедия.
- Давомийлиги: 1 соат 59 дақиқа.
- IMDb: 7.6.
Севгилиси ўлдирилганидан сўнг, Дедпул чуқур депрессияга тушиб қолади. Аммо у келажакдан келган, мутацияга учраган Кейбл билан тўқнаш келишга мажбур бўлади. Кейбл суперқобилиятларга эга бир ўсмирни ўлдиришни режалаштиради, чунки гўёки бола келажакда ёвузликка айланади. Дедпул ҳатто Кейбл билан жанг қилиш учун жамоа тузишга мажбур бўлади, лекин режалар кутилганидек ўхшамайди.
“Дедпул-2” фильмида кўплаб қизиқарли эпизодлар мавжуд, ҳаттоки Мэтт Деймон ҳам таниб бўлмайдиган гримда пайдо бўлади. Аммо энг кулгили образ — кўринмас одам. У аслида қандай кўринишда эканини томошабин фақат қаҳрамоннинг ўлими саҳнасида бир неча сонияга кўради. Ва бу одам — Бред Питт эканлиги маълум бўлади.
Райан Рейнолдс Питтни бундай кичик ролга тушишга кўндирган. Қизиғи шундаки, Питтнинг гонорари фақат бир чашка қаҳва бўлган. Аммо у шарт қўйган: ичимликни шахсан Райан Рейнолдснинг ўзи олиб келиши керак эди. Шу тарзда келишув амалга ошган.
“Дункерк”даги Майкл Кейн
- Буюк Британия, АҚШ, Франция, Нидерландия, 2017 йил.
- Ҳарбий, драма.
- Давомийлиги: 1 соат 46 дақиқа.
- IMDb: 7.8.
Иккинчи жаҳон уруши пайтида минглаб инглиз, француз ва белгия аскарлари Дункерк шаҳри атрофида тузоққа тушиб қолишади. Улар фақат сув орқали қутулишлари мумкин, лекин катта кемалар қирғоққа яқинлаша олмайди. Фильм воқеалари уч хил ракурсдан ноанъанавий тарзда ёритилади: қуруқликда бир ҳафта давомида, сувда бир кун ва осмонда бир соатлик вақт оралиғида кўрсатилади.
Режиссёр Кристофер Нолан бир хил актёрлар билан ишлашни ёқтириши билан танилган. Масалан, Киллианн Mёрфи ва Том Ҳардини тез-тез фильмларида кўриш мумкин, улар “Дункерк” фильмида ҳам рол ўйнашган. Аммо Нолан фильмларининг асосий “рамзи” — Майкл Кейн, у режиссёрнинг барча асарларида, “Бетмен” трилогиясининг биринчи қисмидан бошлаб актёрлик фаолиятини тарк этгунга қадар иштирок этган.
“Дункерк”да Кейн бирор марта ҳам кадрларда кўринмайди. Аммо актёр барибир бу фильмга яширинча қўшилган. У фильмда Ҳарди ижро этган учувчига радио орқали буйруқ беради. Нолан буни 1969 йилда суратга олинган “Англия учун жанг” фильмига ишора деб билади, чунки ўша фильмда Кейн эскадриля қўмондони ролини ижро этганди.
“Юлдузлар жанги: сўнгги жедай”даги Дениел Крейг
- АҚШ, 2017 йил.
- Фантастика, саргузашт, жангари.
- Давомийлиги: 2 соат 32 дақиқа.
- IMDb: 6.9.
Рей жедайлар маҳоратини ўрганиш учун Люк Скаюолкердан таълим олишга йўл олади, аммо Люк янги шогирдидан мутлақо мамнун эмас. Шу билан бирга, Сопратив кучлари малика Леянинг бошчилигида Биринчи Орден қўшинларига қарши охирги имкониятларидан фойдаланиб курашишади.
“Юлдузлар жанги” 2015 йилда қайта бошланганидан бери турли эпизодлар франшизанинг қизиқарли жиҳатларидан бирига айланди. Масалан, фильмда шаҳзода Гарри ва шаҳзода Уилям ҳам кўриниш беради, аммо уларни таниб бўлмайди, чунки улар Империя аскарлари шлемларида чиқади. Шу каби актёр Дениел Крейг ҳам аскар образида суратга тушган.
Изоҳ (0)