Голливуднинг кучли кинематографлари фильмларида иштирок этишни истайдиган актёрлар жуда кўп. Улар лойиҳага қабул қилинишдан аввал бир неча босқичдан иборат кастингдан ўтади. Аммо машҳур актёр бўлишига қарамай, маълум образ учун танловда ўзининг истеъдодини етарлича кўрсата олмаган юлдузлар ҳам бор. Қуйида оммабоп фильмлар учун ўтказилган кастингдан йиқилган юлдузларни кўриб чиқамиз.
Том Ҳолланд — “Юлдузлар жанги: кучнинг уйғониши” (2015)
Том Ҳолланд “Юлдузлар жанги” сиквелининг трилогиясида Фин ролини ўйнашга даъвогар эди. Лекин актёр кастингдан ўта олмади, чунки образга кирган вақтда кулгидан ўзини тия олмаган эди.
“Мен тўрт-бешта тингловдан ўтдим. Эсимда, дроидни ўйнаётган бир аёл билан саҳнада суратга тушаётган эдик. Мен: “Биз кемага қайтишимиз керак!” деб қичқирдим. У эса жавобан: “Бип, бип, бип, бип” дея такрорлар эди. Дроид образининг бундай қилиқларидан кулиб юборар эдим. Ҳозир воқеани эсласам, уялиб кетаман”, — дейди актёр.
Охир-оқибат режиссёр Жон Боегани Фин сифатида танлаб олди.
Эндрю Гарфилд — “Нарния йилномалари: шаҳзода Каспиан” (2008)
Актёр Эндрю Гарфилд “Нарния йилномалари”нинг иккинчи қисмида шаҳзода Каспиан образини гавдалантиришни жуда истар эди. Тингловдан ўта олмаганини эшитгач, актёр бундан қаттиқ ранжиди ва агентидан бунинг сабабини билиб беришини сўради. Маълум бўлишича, режиссёр Гарфилдни етарлича келишган эркак деб ҳисобламас экан. Каспиан роли Бен Барнсга насиб қилди.
“Бен жуда чиройли ва иқтидорли йигит. Шундай экан, режиссёрнинг бу қароридан норози эмасман. Менимча, у ўз ишини аъло даражада бажарди”, — деди Гарфилд.
Кичик Фредди Принтс — “Ўргимчак одам” (2002)
Фредди Принтсда катта экранда намойиш этилган энг биринчи ўргимчак одам бўлиш имконияти юқори эди, аммо актёр уни қўлдан бой берди. Бунга фильм режиссёри Сем Рейми билан учрашувдаги суҳбат сабаб бўлди.
“Режиссёр олдида жуда ҳаяжонда, бир оз асабий эдим. Сем мендан ўргимчак одамни нима учун яхши кўришимни айтиб беришимни сўради. Мен эса ўзга сайёралик симбиот Веном ҳақида сўзлай бошладим. Учрашувни тарк этар эканман, ўргимчак одам ўрнига Веном ҳақида 25 дақиқа айтиб берганим ёдимга тушди. Қандай аҳмоқлик! Ўша кеча мен ўзимдан қаттиқ хафа ва ғазабланган ҳолда уйга қайтдим”, — деди Фредди.
Ўргимчак костюми охир-оқибат актёр Тоби Магуайрга топширилди.
Зои Кравитс — “Қора рицар: афсонанинг қайта туғилиши” (2012)
Актриса Зои Кравитснинг таъкидлашича, унга режиссёр Кристофер Ноланнинг “Бетмен” трилогияси учинчи қисми кастингида қатнашишга йўл қўйишмаган. Бунга унинг ирқи сабаб бўлган.
“Бу фикр айнан Кристофер Ноланга тегишлими ёки йўқ — менга қоронғи. Балки бундай ирқчилик қайсидир кастинг директори ёки унинг ёрдамчисининг фикридир. Ўша вақтда мени “тоо урбан” (эвфемизм, қора танли деган маънони билдиради) деб аташган. Мени сценарийни ҳам ўқий олмаса керак, дейишганда қаттиқ хафа бўлганман”, — дея эслайди актриса.
Кейинроқ Зои Метт Ривзнинг “Бетмен” (2022) фильмида Мушук аёл ролини ўйнаган.
Бренда Сонг — “Ўта бадавлат осиёликлар” (2018)
Маколей Калкиннинг қаллиғи Бренда Сонгнинг айтишича, унинг ташқи кўриниши тўлиқ осиёликларга ўхшамагани учун “Ўта бадавлат осиёликлар” романтик комедиясида суратга туша олмаган.
“Бу воқеа менинг юрагимни синдирди. Эътибор беринг, фильм қаҳрамони 20 ёшда, у аслида осиёлик бўлган Америка фуқароси. Қандай қилиб бундай ролга тўғри келмаслигим мумкин?” — дея таажубланади актриса.
Роберт Редфорд — “Битирувчи” (1967)
Роберт Редфорд “Битирувчи” фильмида Бенжамин Бреддок образини гавдалантиришни орзу қилган. Бироқ мазкур фильм режиссёри Майк Николс фикрича, Робертдек келишган ва ўзига ишонган актёр муваффақиятсиз, ҳаётда ўз ўрнини топа олмаган йигит ролини ўйнай олмас эди. Мазкур рол актёр Дастин Ҳоффманга топширилди.
Изоҳ (0)