Ушбу тетиклантирувчи ичимлик бир неча асрлар олдин қадимги Хитойда пайдо бўлган. Орадан шунча вақт ўца ҳамки, чой ҳамон ўз аҳамиятини йўқотмаган: у тиббий ва косметик мақсадларда ишлатилади, баъзи мамлакатларда таомларга ҳам қўшилади ва, албатта, ўзининг ёқимли ифори ва таъми туфайли бутун дунё бўйлаб одамларнинг севимли ичимлиги ҳисобланади. Кўк чойнинг бу қадар кенг тарқалишига сабаб нима? Бугун ушбу шифобахш ичимликнинг илмий тадқиқотлар билан тасдиқланган 10 та фойдаси ҳақида сўз юритамиз.
1. Оздиради
Кўк чой таркибида эпигаллокатехин галлат (EGCG) деб номланган ўсимлик бирикмаси мавжуд, у метаболизмни тезлаштиради ва ёғ тўқималари эришига ёрдам беради.
2. Умрни узайтиради
Кўк чой сурункали касалликларга қарши энг яхши ҳимоядир. Уни мунтазам истеъмол қилиш умрни узайтириши исботланган.
300 мингдан ортиқ кўнгиллилар иштирок этган япон тадқиқотига кўра, ҳар куни кўк чой ичиш бевақт ўлим хавфини камайтиради. Энг яхши натижани кунига 5 пиёладан кўк чой ичган иштирокчилар кўрсатган.
3. Саратонга чалиниш хавфини камайтиради
Кўк чой антиоксидант вазифасини бажарадиган полифеноллар — фойдали ўсимлик бирикмаларига бой. Полифеноллар ҳужайра ДНКсини шикастлайдиган ва саратон хавфини оширадиган эркин радикаллар таъсиридан ҳимоя қилади.
4. Холестерин даражасини пасайтиради
Ушбу шифобахш чойни истеъмол қилиш юрак хасталиклари билан боғлиқ ЛДЛ номли зарарли холестерин миқдорини камайтиради. Бу фанда илмий исботланган. Шунингдек, кўк чой таркибида катехинлар, яъни кучли антиоксидантлар мавжуд бўлиб, улар холестеролни танадан олиб ташлашга ёрдам беради. Бу эса, ўз навбатида, юрак-қон томир касалликлари хавфини камайтиради.
5. Қондаги қанд миқдорини камайтиради
Тадқиқотларга кўра, мазкур чой қондаги қанд миқдорини камайтиришга ва умумий глюкоза алмашинувини яхшилашга ёрдам беради. Ўрта ер денгизи диетасининг бир қисми сифатида мунтазам кўк чой ичиш 2-тоифа қанд касаллиги ривожланиш эҳтимолини камайтиради.
6. Ёшартиради
Кўк чойдаги антиоксидантлар тери ҳужайраларини ҳимоя қилади, эркин радикаллар ва ултрабинафша нурларидан келиб чиқадиган зарардан асрайди ва вақт ўтиши билан коллаген моддасининг табиий равишда парчаланиш хусусиятини секинлаштиради.
7. Хотирани мустаҳкамлайди
Ҳар куни кўк чой ичиш хотирани, диққатни ва умумий идрок этиш қобилиятини яхшилайди. Масалан, чой таркибидаги Л-теанин моддаси сергаклик ва диққатни жамлашга, мураккаб муаммоларни ҳал қилиш қобилиятини ривожлантиришга ёрдам беради.
8. Суякларни мустаҳкамлайди
Бир кунида камида бир пиёла кўк чой ичиш суякларнинг емирилиши, остеопороз ва синишидан асрайди. Ушбу ичимлик танадаги яллиғланишни камайтиради ва суякларнинг зичлигини вақт ўтиши билан оширади.
9. Энергия бахш этади
Кўк чой кофеин ва Л-теанин моддалари туфайли жисмоний машқлар пайтида энергиянинг барқарор бўлишини таъминлайди. Натижада спорт машғулотлари самараси ошади.
10. Тинчлантиради
Стрессни ҳеч нарса бир зумда тўлиқ бартараф эта олмайди, бироқ айнан кўк чой сизни янада хотиржам ҳис қилишингизга ёрдам беради. Тадқиқотлар шуни кўрсатадики, Л-теанин организмдаги дофамин ва серотонин даражасини тартибга солишга ёрдам беради. Бу эса тана тезроқ тинчланиши, хавотир ва тушкунлик ҳиссидан халос бўлишига кўмак беради.
Изоҳ (0)