Шамоллашни тез даволайди: кузнинг энг шифобахш 5 та резавор меваси

Куз фасли танамиз турли вирусларга қарши курашиши учун қўшимча ёрдамга муҳтож бўладиган вақт. Иммун тизимини мустаҳкамлаш ва қишга тайёргарлик кўришнинг энг яхши усулларидан бири бу витаминлар, минераллар ва антиоксидантларга бой кузги меваларни истеъмол қилишдир.

Ушбу мақолада шамоллашдан ҳимоя қиладиган ва саломатликни мустаҳкамлайдиган 5 та энг фойдали резавор меваларни кўриб чиқамиз.

Клюква

Шифокор ва диетологлар клюква витамин, минерал, антиоксидант ва клетчатканинг ҳақиқий манбаи эканини тасдиқлайди, ушбу резавор ЎРВИга қарши курашда кенг қўлланилади. Клюква иммунитетни мустаҳкамлаш бўйича барча рекордларни ортда қолдиради, чунки у C ва B витаминларини ўз ичига олади ва совуқ мавсумда организмни зарур ёрдам билан таъминлайди. Қолаверса, шамоллаш ва гриппдан тезроқ қутулишга ёрдам бериши исботланган.

Клюква таркибидаги соғлиққа ижобий таъсир кўрсатадиган биоактив компонентлар сурункали яллиғланишни муваффақиятли енгиб, яллиғланишнинг олдини олишга хизмат қилади ва юқори нафас органлари касалликларининг олдини олишда самарали ҳисобланади. Шунингдек, клюкванинг қуйидаги шифобахш хусусиятлари мавжуд:

• Инфекцион касалликлар ривожланиш хавфини камайтиради;
• Юрак-қон томир саломатлигини яхшилайди;
• Қон томирлар деворларини мустаҳкамлайди ва холестерин даражасини нормаллаштиришга ёрдам беради;
• Иштаҳани ва овқат ҳазм қилишни яхшилайди;
• Ичакнинг мунтазам ҳаракатланишини рағбатлантиради ва вазнни назорат қилиш учун фойдалидир.

Клюква янги узилган вақтида, мевали шарбат, компотлар ёки смузи сифатида истеъмол қилинади ҳамда соуслар тайёрлаш учун ишлатилади.

Чаканда (Облепиха)

Чаканда меваси август сентябрь ойларида пишиб етилади, у майда, тухумсимон ёки думалоқ, новдаларга зич ёпишган, ранги оч сариқ рангли мева бўлиб, қадимдан халқ табобатида қўлланилган. Унинг таркибида А, C ва E витаминлари мавжуд, улар иммунитет тизимини мустаҳкамлашга, ҳужайраларни қаришдан ҳимоя қилишга ва терининг ҳолатини яхшилашга ёрдам беради. C витамини шамоллаш ва гриппнинг олдини олиш учун айниқса фойдалидир, E витамини кучли антиоксидантдир.

Чаканда меваси

• К гуруҳ витамини борлиги сабаб, моддалар алмашинувини бошқаради;
• қон таркибини яхшилаб, унинг қуюлишини олдини олади;
• тери, тирноқ ва соч сифатини яхшилайди;
• холестерин миқдорини камайтиради.

Наъматак

Совуқ мавсумда иммунитет турғун ишлашига ёрдам берадиган резавор бу наъматак бўлиб, у C витаминининг табиий манбаи ҳисобланади. Ундан тайёрланган чой ва дамламалар шамоллашдан ҳимоя қилади, қон томирлари ва юрак саломатлигини қўллаб-қувватлайди. Наъматакнинг фойдали хусусиятлари:

• Метаболизмни яхшилайди ва ошқозон-ичак трактининг фаолиятини қўллаб-қувватлайди;
• Қон томирларини мустаҳкамлайди, атеросклероз ривожланиш хавфини камайтиради;
• Яраларни даволашни рағбатлантиради ва ҳужайралар янгиланишини тезлаштиради.

Қорағат

Қора смородина C витаминига бой резавор, у вирусли инфекцияларга қарши курашишга ёрдам беради. Таркибидаги антиоксидантлар ҳужайраларни шикастланишдан ҳимоя қилади ва қариш жараёнини секинлаштиради. Қора смородина таркибида артерияларнинг қотиб қолиши, саратон ёки юрак касалликларини ривожлантириш хавфини камайтирадиган қимматбаҳо кислоталар мавжуд. Бундан ташқари:

• Кўзлар саломатлигини таъминлайди ва кўриш қобилиятини яхшилайди;
• Қон босимини нормаллаштиришга ёрдам беради;
• Юрак-қон томир касалликлари хавфини камайтиради.

Қора смородина нонушта учун бўтқаларга, ширинликларга ёки мевали шарбатларга қўшиб истеъмол қилиш мумкин.

Брусника

Брусника ўрмон меваси фойдали ва ўзига хос ёқимли таъмга эга резавор. У Ўзбекистонда етиштирилмайди, балки импорт қилинади. Брусника организмдаги яллиғланиш жараёнларининг олдини олиш ва даволаш учун ажойиб восита. У буйраклар саломатлигини сақлашга ёрдам беради ва таносил йўллари инфекцияларининг олдини олади. Брусника иммунитетни мустаҳкамловчи антиоксидантлар ва витаминларга бой.

• Яллиғланиш билан курашишга ёрдам беради;
• Қондаги шакар даражасини пасайтиради;
• Жигар ва буйраклар фаолиятини яхшилайди.

Ушбу резаворни шарбат ёки компот кўринишида сақлаб, қишда ичиш жуда фойдалидир.