Мода саноати доимо бутун дунёдаги хотин-қизларни ўзига жалб этиб келган. “America’s next top model” (Американинг навбатдаги топ модели) шоусининг юқори рейтингларни эгаллагани буни тасдиқлайди.
Албатта, телешоу ва машҳур журналлар саҳифаларидаги суратлар супер моделларнинг ҳақиқий турмуш тарзини акс эттирмайди. Кўплаб муваффақиятли моделлар ўз карьераси давомида моделлик соғлиғига путур етказганини ва шахсий ҳаётида турли муаммоларни келтириб чиқарганини тан олади. Шунга қарамай, моделлик бизнеси энг яхши ҳақ тўланадиган соҳалардан бири бўлиб қолмоқда. Қуйида дунёдаги энг катта маош оладиган супер моделлар билан танишамиз.
Виттория Черетти
Виттория Черетти 17 йилдан бери моделлик бизнесида фаолият юритади, аммо машҳурлик унга фақат 2023 йилда, Леонардо Ди Каприо билан бўлган муносабати ҳақидаги хабарлардан кейин насиб этди. Италиялик аёл ҳамкасбларидан фарқли ўлароқ, шахсий ҳаёти ҳақида гапиришни ёқтирмайди ва ижтимоий тармоқларда фақатгина мода кўргазмаларидан фоторепортажларни жойлайди.
Виттория ўз ишига масъулият билан ёндашади ва ҳамма нарсага ўз меҳнати билан эришганини очиқ айтади. 2023 йил ҳолатига кўра, Витториянинг умумий бойлиги 3,5 миллион долларга баҳоланган.
Жоан Смоллс
2023 йилда супермодел Жоан Смоллс 6,5 миллион доллар ишлаб топди ва йилнинг энг юқори даромадга эга моделлар рўйхатида саккизинчи ўринни эгаллади.
“Пуэрто Риколик подиум юлдузи тенгдошларига қараганда кўпроқ мода кўргазмаларида қатнашган. У Estее Lauder, Moschino каби бошқа брендлар учун суратга тушишга ҳам вақт топади”, деб ёзади Forbes нашри. Сўнгги тўрт йил ичида моделнинг даромади 3 миллион долларга ошган.
Белла ва Жижи Ҳадид
2022 йилда Белла Ҳадид мода оламидан вақтинчалик ғойиб бўлди. Моделнинг Лайм касаллиги (буйрак етишмовчилиги билан боғлиқ аутоиммун касаллик) кучайиб кетди, шунинг учун у карьерасидан танаффус олишга мажбур бўлди. 2018 йилда Forbes рейтингида 8,5 миллион доллар даромади билан Белла Ҳадид саккизинчи ўринни эгаллади. 2023 йил охирида эса у яна ишга қайтди ва 2024 йил бошида мода журналлари муқоваларида чиқа бошлади.
Супермоделнинг катта опаси Жижи Ҳадид эса моделлик саноатида чўққиларни забт этишда давом этмоқда. 2023 йилда у 12 миллион доллар ишлаб топди. Моделнинг даромади Maybelline, Тоmmy Hilfiger ва Reebok каби гигант брендлар билан ҳамкорликдан келади. Жижи ўзини синглиси билан таққосламайди.
“Белла ва мен бутунлай бошқача услубларга эгамиз, шунинг учун мен муваффақиятимизни ҳеч қачон солиштирмайман. Синглим менга доим илҳом беради ва биз бир-биримиздан ўрганиб борамиз”, — деди супермодел Ellе нашрига.
Жизел Бюндхен
2007 йилда Жизел Бюндхен Victorie’s Secret бренди билан ҳамкорлик қилишни тўхтатди. Модель ушбу компания билан 90 йилларнинг охиридан ишлай бошлаган. “Бир неча йил аввал подиумда ички кийимда пайдо бўлиш мен учун одатий ҳол эди, бироқ вақт ўтиши билан ўзимни ноқулай ҳис қила бошладим”, деб ёзади у “Англаганларим: мазмунли ҳаёт сари” номли хотира китобида.
Бюндхен мода бизнесини тарк этган бўлса-да, у дунёдаги энг кўп маош олувчи моделлардан бири бўлиб қолмоқда. Жизел 2018 йилда 10 миллион доллар ишлаб топди ва Forbes бўйича энг бадавлат моделлар рўйхатида бешинчи ўринни эгаллади.
Кара Делевин
2015 йилда Делевин моделлик фаолиятини якунлаганини эълон қилди. Унинг энг содиқ мухлислари ҳам модел подиумга қайтишига ишонмаган эди, чунки Кара псориаз касаллигидан азият чекарди. Мода ҳафталикларида доимий стрессга учраш ва узоқ соатлар давомида суратга тушиш ишлари унинг тери ҳолатига янада салбий таъсир қилди. Модель иштирок этган ҳар бир намойиш учун қалин қопламали тонал кремлардан фойдаланишга тўғри келди.
“Мен билан ишлайдиган одамлар қўлқоп кийишар ва менга тегиб кетишдан қўрқар эди, чунки улар касаллик юқумли деб ўйлашар эди”, — деди Кара Тhе Тimes нашрига берган интервьюсида.
Делевиннинг 2018 йилда моделлик оламига қайтиши унинг карьерасида ҳақиқий портлаш бўлди ва бир йилда даромади 10 миллион доллардан ошди. 2023 йил ҳолатига кўра, Каранинг умумий бойлиги 31 миллион долларга баҳоланмоқда.
Роузи Ҳантингтон-Уайтли
Моделнинг шахсий ички кийим бренди ва косметика маҳсулотлари дўконлари унга 2018 йилда 11,5 миллион доллар даромад келтирди ва ўша йили Роузи Ҳантингтон-Уайтли Forbes рейтингида учинчи ўринни эгаллади. Шу вақтда модел актёр Жейсон Стейтем билан фарзандли бўлди ва бир муддатга унинг карьерасида танаффус бўлди. Аммо буларнинг бари Роузининг йиллик даромадига умуман таъсир қилмади.
Кендалл Женнер
2018 йилда Кендалл Женнер 22,5 миллион доллар ишлаб топди. Forbes нашри маълумотларига кўра, ўша вақтдаги 23 ёшли моделнинг даромади Estee Lauder, Adidas ва Calvin Klein брендлари билан тузилган шартномалар туфайли ошиб борган.
2023 йил ҳолатига кўра, Женнер дунёдаги энг кўп маош олувчи супермоделдир. Лекин даромаднинг катта қисми унинг модел сифатидаги фаолиятидан эмасдир. Женнернинг асосий бойлиги “Кееping Up With Kardashian’s” шоусидаги иштирокидан тўпланган.
Изоҳ (0)