Теридаги пигмент доғлари — бу жуда кенг тарқалган ҳодиса, аммо уларнинг намоён бўлиши ҳар хил: айрим сепкиллар диққатни ўзига жалб қилиши мумкин, аммо юз терисидаги турли ўлчамдаги жигарранг доғлар керакциз ташвишланиш ва комплексларни келтириб чиқариши мумкин. “Новий очаг” нашри пигмент доғлари қандай пайдо бўлишини ва уларни йўқ қилиш учун нима қилиш кераклиги борасида тўхталди.
Ёзда кучаядиган гиперпигментация — теридаги айрим жойларнинг ранги ўзгариши бўлиб, бу пигмент ишлаб чиқарадиган меланоцит ҳужайраларидан келиб чиқади. Тери пигменти меланин эпидермиснинг маълум бир қисмида тўпланганда, доғлар терининг асосий рангидан кўра тўқроқ кўринади. Қуёш меланин ишлаб чиқаришни фаоллаштиради. Қуёш таъсиридаги пигментация кўпинча юз, бўйин, елка ва қўл терисида пайдо бўлади. Пигмент доғлари оғриқсиз бўлиб, улар терининг сиртидан кўтарилмайди, терининг тузилишини ўзгартирмайди.
Гиперпигментацияни келтириб чиқарадиган омиллар
Қуёш ҳамма учун нур сочади, лекин дугонангизда пигмент доғлари бор-у, сизда йўқ. Нима учун бундай?
Тери пигментациясининг ҳосил бўлиши учун жиддий қўзғатувчи омиллар:
- гормонал мувозанат (ҳомиладорлик, менопауза);
- гормонал бузилишлар;
- экологиянинг ёмонлиги;
- организмдаги метаболик жараёнларнинг бузилиши;
- ошқозон-ичак трактининг баъзи касалликлари;
- репродуктив тизимнинг, репродуктив органларнинг ўткир ва сурункали яллиғланиши (масалан, эндометриоз);
- ирсий омил (гиперпигментациянинг турларидан бири — сепкиллар авлоддан авлодга ўтиши мумкин);
- баъзи дориларни қабул қилиш:
Шунингдек, тери пигментацияси организмнинг витамин ва фермент баланси билан чамбарчас боғлиқ. А, C ва PP витаминлари етишмаслиги меланин ишлаб чиқаришни оширади ва B витаминлари етишмаслиги уни камайтиради.
Гиперпигментациянинг олдини олиш мумкинми?
- Аввало, ҳар доим максимал ҳимоя факторига эга бўлган юз қуёш кремидан фойдаланинг. Энди SPF 50 бўлган нафақат кунлик парвариш кремлари, балки тонал кремлар ва ҳатто, упалар ҳам мавжуд.
- Ёзда ҳам, қишда ҳам терини қуёш таъсиридан ҳимоя қилиш жуда муҳимдир.
- Бурун, пешона ёки иягингизга бўлар-бўлмасга қўл билан тегманг: бармоқ ҳимоя қопламасини ўчирган жойда доғ пайдо бўлади.
- Юзингизга соя туширадиган шляпа кийинг.
Пигмент доғларидан қандай қутулиш мумкин?
Ёзда юз териси учун мураккаб косметик муолажалар ва техникалар ўтказиш мумкин эмас. Қуёш ёздагидек фаол бўлмаган вақт — кузгача кутинг.
Айни пайтда дорихона косметикаси турлари орасидан тери учун махсус маҳсулотларни танлашингиз мумкин. Қайси таркибий қисмларга эътибор бериш керак?
Масалан, ретиноидли маҳсулотлар — А витаминининг ҳосилалари — тери ҳужайраларининг янгиланиш жараёнини тезлаштиради ва ҳуснбузардан кейинги изларга ва ҳатто, ёшга боғлиқ доимий пигментацияга қарши курашда ёрдам беради.
C витамини юқори бўлган маҳсулотлар эпидермиснинг янгиланишига ҳисса қўшади, коллаген синтезини тезлаштиради ва пигмент доғларини бартараф этишга ҳисса қўшади.
Арбутин моддасини ўз ичига олган маҳсулотлар. Келиб чиқиши табиий бўлган бу оқартирувчи компонент турли шифобахш ўсимлик экстрактларидан олинади. Арбутин меланин синтезида иштирок этадиган асосий фермент бўлган тирозиназани блоклайди.
Кислоталар (гликолик, сут, олма ва ҳоказо) бўлган воситалар терининг янгиланишини тезлаштиради ва пигментацияни сезиларли даражада оқартиради.
Изоҳ (0)