Россиялик мухолифатчи Алексей Навальнийнинг колонияда вафот этишига заҳарланиш сабаб бўлган. Бу ҳақда ички ҳужжатлар билан танишган The Insider журналистлари хабар берди.
Журналистлар Навальнийнинг “Полярний волк” колониясида ўлими билан боғлиқ юзлаб расмий ҳужжатларга кириш ҳуқуқига эга бўлган. Уларга кўра, расмийлар ҳужжатлардан расмий версияга тўғри келмайдиган аломатларни атайлаб олиб ташлаган. Шифокорларнинг тасдиқлашича, бу аломатлар Навальний заҳарланганидан далолат беради.
The Insider’нинг ихтиёрида, жумладан, адлия майори Александр Варапаэв томонидан имзоланган жиноят ишини қўзғатишни рад этиш тўғрисидаги қарорнинг икки версияси ҳам бор. Олдинги версияда Навальний симптомлари қуйидагича тасвирланган:
Маҳкум Навальний А.А. 2024 йил 16 февраль куни №2 камерали турдаги хонанинг сайр майдонида бўлганида ўз саломатлигининг кескин ёмонлашганини ҳис қилиб, бу ҳақда муассаса навбатчи ходимига хабар берган. Навбатчи уни сайр майдонидан чиқариб, №4 бўлимига олиб борган.
Шундан сўнг маҳкум Навальний А.А. полга ётиб, қорин соҳасида кескин оғриқдан шикоят қила бошлаган, кўнгли айниб, рефлектор равишда қусиш бошлаган, тутқаноқ хуружлари пайдо бўлган ва ҳушидан кетган. Бу ҳақда дарҳол муассаса тиббиёт ходимларига хабар берилган.
Ушбу қарорнинг кейинги, якуний версиясида қорин оғриғи, қусиш ва тутқаноқ ҳақидаги барча сўзлар олиб ташланган.
Аммо The Insider нашрининг қўлида яна бир ҳужжат бор — “олинган объектлар” рўйхати, унда “қусиш массалари” ҳам қайд этилган. Бу намуналар расмий равишда на экспертиза, на қусиш ҳақида ҳеч қандай хабар берилмаган бўлса ҳам, экспертизага топширилган.
Ҳужжатлар аввалроқ Юлия Навальнаянинг “у ўлимидан олдинги сўнгги дақиқаларда қорин соҳасида кучли оғриқдан шикоят қилган” деган сўзларини тасдиқлайди.
Навальнийни 2020 йилда “Новичок” билан заҳарланишидан кейин Омск шифохонасида даволаган реаниматолог Александр Полупан фикрига кўра, ҳужжатларда келтирилган симптомлар расмий версия билан мутлақо мос келмайди.
Расмий ўлим сабаби — юрак ритмининг бузилиши — қарорда келтирилган симптомларни, яъни қорин соҳасидаги кескин оғриқ, қусиш ва тутқаноқларни изоҳлай олмайди. Бундай симптомларни заҳарланишдан бошқа нарса билан тушунтириш жуда қийин. Қорин оғриғи ва тутқаноқлар орасидаги қисқа вақт бу, масалан, фосфорорганик бирикма бўлиши мумкинлигидан далолат беради (шу турдаги моддаларга “Новичок” ҳам киради, лекин тери орқали эмас, балки ички қўллашда).
Полупаннинг хулосаларига The Insider томонидан сўралган бошқа турли соҳалардаги шифокорлар ҳам қўшилади.
Заҳарловчи моддадан фойдаланилганини тасдиқловчи бошқа фактлар ҳам мавжуд: ҳокимият узоқ вақт давомида жасадни бермаган ва биоматериалларнинг муқобил экспертизасини ўтказишга рухсат берилмаган. Бироқ энди заҳарланиш ҳолати ҳужжатларда расмий равишда тасдиқланди.
Изоҳ (0)