Ҳар қандай аёл юз териси тиниқ ва муаммоларсиз бўлишини истайди. Терининг яхши кўриниши ва уни жиддий муаммолардан ҳимоя қилиш учун косметик воситаларни тўғри танлаш ва улардан фойдаланишда хатоларга йўл қўймаслик керак. Бугун қуёшдан ҳимояловчи кремларни қўллашда энг кенг тарқалган хатоликлар ҳақида маълумот берамиз.
1-хато: SPF қуёш нури остида қанча вақт туришингиз мумкинлигини кўрсатади деб ўйлаш
Бу гап қисман тўғри, масалан, SPF суртилган тери қуёш нурлари остида 150 дақиқа ичида куйса, ҳимояланмаган тери қатлами 10 дақиқада куйиб қолади. Бунда 150÷10=15 SPF формуласи келиб чиқади.
Аммо дерматолог ва онкологик касалликлар маркази жарроҳи Энтони Росси таъкидлашича, лабораториядаги нурлар ва очиқ ҳаводаги қуёш нурлари бир-биридан фарқ қилади. Ултрабинафша нурларнинг кучи доимий ўзгариб туради, шу сабабли SPF’ни ҳар икки соатда ёки ҳар ювингандан сўнг янгилаш тавсия этилади.
2-хато: Ҳар томонлама ҳимояловчи универсал крем ишлатмаслик
Ozon қатлами орқали терига зарар етказувчи икки турдаги нурланиш бизга етиб келади: бу UVA ва UVB нурларидир. UVB нурлари терини куйдиради, саратонни келтириб чиқаради. UVA нурлари эса терини қуритади, пигмент доғлар ҳосил қилади ва эластикликни йўқотиш билан бирга келадиган қаришни келтириб чиқаради. Иккала нур ҳам эпидермис учун зарарлидир. Шу сабабли қуёшдан ҳимоя қилувчи кенг спектрли воситалардан фойдаланиш лозим.
3-хато: Бошқа косметика таркибидаги SPF’га ишониш
Кўплаб намлантирувчи ёки тонал кремлар, пудралар таркибида SPF ҳимоя борлиги ёзилган бўлади, аммо улар жуда паст даражада ҳимояловчи таркибга эга. Шунинг учун доим аввал қуёшдан ҳимоя қилувчи кремни суртиш, ярим соатдан сўнг бошқа косметик маҳсулотлардан фойдаланиш керак.
4-хато: Кремни тўғри танламаслик ва етарли миқдорда суртмаслик
Спрей кўринишидаги SPF ҳимояси юзга бир текис қатламда тарқалмайди, стик кўринишидаги кремлар эса гигиеник жиҳатдан ноқулай ҳисобланади. Шу сабабли фақат крем кўринишидаги қуёшдан ҳимоялаш воситасини танлаш ва терининг квадрат сантиметрига икки миллиграмм миқдорда суртиш керак. Бутун танага эса тахминан икки ош қошиқ миқдорда восита сарфланади.
Фото: ДСМ
5-хато: Кўзларни ҳимоя қилмаслик
Қора кўзойнаклар шунчаки чиройли аксессуар эмас, балки ҳақиқатан ҳам муҳим ҳимоя воситасидир. Кўзойнак нафақат кўз атрофидаги терини, балки кўз шоҳ пардасини ҳам зарарли нурлардан ҳимоя қилади. Ултрабинафша нурланиш таъсирида катаракта ривожланиши мумкин.
6-хато: Ташқарига чиққандан сўнг SPF’дан фойдаланиш
Қуёшдан ҳимояловчи кремдан доимо уйдан чиқишдан тахминан ярим соат аввал фойдаланиш зарур, чунки ҳар қандай терини парвариш қилиш маҳсулотлари каби, SPF креми терида бир текис ҳимоя қобиғи ҳосил қилиши учун вақт керак.
7-хато: Сочлар остидаги терига эътибор бермаслик
Қулоқлар, кўз қовоқлари, бўйин орқаси, лаблар ва оёқлар каби тана қисмларини ҳимоялашни кўпинча ёддан чиқарамиз. Сочлар бош терисини етарли даражада қуёшдан асрай олмайди. Шу сабабли офтоб нури тўғридан-тўғри тушадиган жойларда бош кийимини кийиш муҳимдир.
Изоҳ (0)