Европарламент Страсбургдаги ялпи мажлисида Европа комиссияси томонидан Киевга музлатиб қўйилган Россия активларидан тушган даромаддан тўлаш ҳисобига 35 миллиард евро миқдорида кредит ажратиш бўйича таклиф қилинган механизмни маъқуллади. Бу ҳақида Европа Парламенти веб-сайтида хабар берилди.
518 нафар европалик депутат ёқлаб, 56 нафар парламентарий қарши овоз берди, яна 61 нафар депутат бетараф қолди. “Шундай қилиб, биз Россиянинг музлатилган активларидан тушган даромадни Украинани молиялаштириш учун ишлатаётганимиз ҳақида аниқ сигнал юборяпмиз”, деди Европарламент раиси Роберта Мецола.
Европарламент маъқуллаганидан сўнг, Украинага 35 миллиард евро ажратиш масаласи Европа Иттифоқи Кенгаши томонидан кўриб чиқилиши керак, бу иш ҳафта охиригача амалга ошиши кутилмоқда. Шу билан бирга, Еврокомиссиянинг Россиянинг Европа Иттифоқи юрисдикцияларида музлатилган суверен активларини экспроприация қилишга уринишларини назорат қилувчи Европа комиссари Дидье Рейндерс, Киев фақат ЕИнинг дастлабки сиёсий шартлари бажарилган тақдирдагина кредит олишини таъкидлади. Бу масала алоҳида меморандумда мустаҳкамланади.
ЕИнинг 35 миллиард евролик кредити G7 кредит линиясининг бир қисми бўлиши мўлжалланган бўлиб, унинг умумий қиймати 50 миллиард доллар ёки 45 миллиард еврони ташкил этиши керак.
Европа Иттифоқи мамлакатлари юрисдикцияларида Россия Федерацияси Марказий банкининг 220 миллиард еврога яқин суверен активларининг асосий қисми 2022 йилда блокланган. Европа комиссиясининг Россия Федерацияси суверен активларидан олинган даромадларни экспроприация қилиш бўйича ҳаракатлари асос қилиб олинган. Европа комиссияси томонидан 2024 йил январь ойида қабул қилинган резолюцияда музлатилган активларни қайта инвестициялашдан олинган даромадлар Россия мулки эмаслиги ҳақида қайд этилган.
Россия президенти матбуот котиби Дмитрий Песков аввалроқ Россия Европадаги ўз активлари ўғирланишига жавоб қайтаришини айтган эди. Унинг таъкидлашича, Москва бунга алоқадорларни қонуний жавобгарликка тортишни ташкил этиш ниятида. Песковнинг фикрича, Европа Киевга ёрдам бериш учун Россия активларидан фойдаланишга қарор қилиб, энг ёмон йўлни танлади.
Изоҳ (0)