Европа Иттифоқи Эрон Россияга баллистик ракеталар етказиб бергани тасдиқланса, унга қарши санкциялар жорий қилиши мумкин. Бу ҳақда Еврокомиссия раҳбари Урсула фон дер Ляен Страсбургда Европарламент аъзолари олдидаги чиқиши чоғида маълум қилди.
“Агар Эрон Россияга баллистик ракеталар етказиб берса, биз қўшимча санкциялар билан жавоб беришга тайёрмиз”, — деди Урсула фон дер Ляен.
21 февраль куни Reuters агентлиги Эрон ҳарбий доираларидаги олти манбага таяниб, Теҳрон Москвага 400 дона “ер-ер” баллистик ракеталарини етказиб бергани ҳақида хабар берди. Агентлик манбаларига кўра, етказиб бериш январь ойида бошланган. Исмини ошкор этмаган Эрон расмийсининг айтишича, Теҳрон Москвани ракеталар билан таъминлашда давом этиш ниятида.
Шундан сўнг Давлат департаменти матбуот хизмати раҳбари Метю Миллер Эрон Россия билан ҳарбий-техник ҳамкорликни кучайтирса, “тезкор ва қаттиқ чоралар” билан таҳдид қилган.
2023 йил июль ойида Украина қуролли кучлари Россия армияси жанговар ҳаракатларда Россия ҳудудида йиғилган Эроннинг Shahed дронларидан фойдаланишни бошлаганини эълон қилди. Ўша йилнинг декабрь ойида Европа Иттифоқи дронлар ишлаб чиқариш билан шуғулланувчи бешта Эрон компаниясига қарши санкциялар киритди.
Шундан сўнг Эрон ташқи ишлар вазири Ҳусайн Амир Абдуллоҳийян, унинг мамлакати ҳеч қачон Россияга Украинада фойдаланиш учун дронлар ва ракеталар етказиб бермаганини айтди.
Изоҳ (0)