Европарламентнинг 705 нафар аъзосидан 63 нафари Европа комиссияси (ЕК) президенти Урсула фон дер Ляен, Европа кенгаши президенти Шарль Мишель ва Европарламент раҳбари Роберта Метсолага мурожаат қилди.
Баёнотда Европарламент депутатлари мамлакат бош вазири Виктор Орбаннинг Россия ва Хитойга ташрифи муносабати билан Венгриянинг Европа кенгашидаги овоз бериш ҳуқуқини тўхтатиб қўйишга чақирмоқда, деб ёзади Politico. Венгрия 1 июлдан бошлаб жорий йилнинг охиригача ЕИ кенгашига раислик қилди.
“Бу Венгриянинг ЕИ кенгашидаги овоз бериш ҳуқуқини тўхтатиб туриш каби ҳақиқий ҳаракатларни талаб қилади, чунки амалиёт оддий танбеҳ иш бермаслигини кўрсатди”, дея мактуб матнидан иқтибос келтиради Politico.
Нашр ихтиёрида бўлган мактубда айтилишича, Венгрия бош вазири ташрифлари чоғида “ўз ваколатларини атайлаб бузиб кўрсатган”.
Депутатларнинг сўзларига кўра, у ўз сафарлари билан “кенгаш раиси лавозимини суиистеъмол қилиб, аллақачон катта зарар етказган”. Нашрнинг ёзишича, ташаббусни Европа халқ партияси, “Янгиланиш”, “Сўл” ва “Яшиллар” вакиллари қўллаб-қувватлаган. Бундан ташқари, Bild эслатишича, кеча, 15 июль куни Еврокомиссия ўз комиссарларидан Венгриянинг ЕИ кенгашига раислиги даврида вазирларнинг норасмий учрашувларида қатнашмасликни сўраган.
Июль ойи бошида Виктор Орбан Киевга ташриф буюриб, Украина президенти Владимир Зеленский билан учрашди ва у билан ўт очишни тўхтатиш имкониятини муҳокама қилди. Шундан сўнг Венгрия бош вазири Россия президенти Владимир Путин билан учрашиш учун Москвага, кейинроқ эса Хитойга келди. Орбан бу ташрифларни тинчликка эришиш миссиясининг бир қисми деб атади. Европа Иттифоқининг юридик хизмати Виктор Орбаннинг Москвага сафарини келишувларни бузиш деб ҳисоблади.
Шундан сўнг Орбан Европа парламентининг биринчи ялпи мажлисида сўзга чиқишга таклиф қилинмади. “Янгиланиш” фракцияси вакили Клара де Мелога кўра, Венгрия бош вазири Европа Иттифоқи қоидаларини ҳурмат қилмайди. Бундан ташқари, ЙК раҳбари Урсула фон дер Ляен ЕИ кенгашининг Венгрияга ташрифини бекор қилди.
Изоҳ (0)