Словения Россияни терроризм ҳомийси сифатида тан олишдан бош тортди, мамлакат ташқи ишлар вазирлиги бунинг сабабини маълум қилди. Бу ҳақда Euractiv портали хабар берди.
Словения парламентининг ташқи сиёсат қўмитаси мухолифатдаги Демократик партиянинг Россияни терроризмга ҳомийлик қилувчи давлат сифатида тан олишга чақирган таклифини рад этди. Қўмита аввалроқ Россиянинг Украинага қарши урушини қоралаш ҳақидаги коалиция хулосаларини қўллаб-қувватлаган ва ҳукуматни расмий Киевга мунтазам ёрдам кўрсатишга ундаган.
“Биз ўз ватанини ҳимоя қилишда, эркинлик ва демократиянинг умуминсоний қадриятлари учун курашда жасорат кўрсатаётган Украина халқини қўллаб-қувватлаймиз ва шу билан бирга Россия босқинини қоралаймиз”, — деган демократлар.
Ҳукмрон коалицияда овоз беришдан олдин ҳам, бу таклифга қарши чиқилган ва Словения ташқи ишлар вазири Таня Фаён бундай ташаббус “бутун рус халқини жазолаш” билан тенг бўлишини таъкидлайди. Бунинг ортидан мамлакат Ташқи ишлар вазирлигининг изоҳи эълон қилинди. Унга кўра, на Европада, на Словения қонунчилигида мамлакатлар терроризмини қўллаб-қувватловчи тоифалар ёки рўйхат мавжуд эмас. Ҳозиргача фақат еттита Европа Иттифоқи давлати ва АҚШ бундай резолюцияларни қабул қилган.
Бу Словения мухолифатига ёқмади ва улар Ташқи ишлар вазирлигининг баҳоналарини “сустлик” деб ҳисоблади ва Россияга қарши санкцияларни кучайтиришга чақирди.
Изоҳ (0)