БМТ Бош ассамблеяси «вақтинчалик босиб олинган Қрим автоном республикаси ва Севастопол шаҳрида инсон ҳуқуқлари аҳволи» номли янгиланган резолюцияни қабул қилди. Бу ҳақда «Укринформ» хабар берди.
Ҳужжатнинг янги таҳририда Россиянинг Украинага бостириб кириши ҳисобга олинган. Резолюцияни 82 давлат қўллаб-қувватлаган, яна 80 давлат бетараф қолган. 14 давлат янгиланган резолюцияга қарши овоз берган. Булар Беларусь, Хитой, Куба, Шимолий Корея, Эритрея, Эфиопия, Эрон, Қозоғистон, Мали, Никарагуа, Россия, Судан, Сурия ва Зимбабве. Ўзбекистон овоз бериш жараёнида иштирок этмаган.
Ҳужжатда Россиянинг Қримдан Украинага қарши тажовуз ва Херсон, Запорожье вилоятларини ноқонуний аннексия қилиш мақсадида фойдаланиши қораланган. Бундан ташқари, резолюцияда «Украина ва украиналикларга нисбатан нафратни қўзғатиш, Россиянинг Украинага қарши ҳужумини оқлайдиган дезинформациянинг таълим тизими орқали тарқатилиши» танқид қилинган.
Шу билан бирга, Қримнинг босиб олиниши Россия кучларининг вақтинчалик назорати остида бўлган Украинанинг бошқа ҳудудларида ҳам инсон ҳуқуқлари соҳасида жиддий инқироз юзага келишига асос бўлгани қайд этилади.
Мавзуга доир:
Изоҳ (0)