Европарламент 1932—1933 йиллардаги Голодоморни Украина халқининг геноциди деб тан олди

Европарламент 1932–1933 йиллардаги Голодоморни Украина халқининг геноциди деб тан олди. Бу ҳақда Deutsche Welle хабар берди.

Маълум қилинишича, 15 декабрь куни парламентнинг 507 нафар депутати тегишли резолюция учун овоз берган, 12 нафари эса қарши чиққан. Худди шундай қарор аллақачон бир қатор давлатлар томонидан қабул қилинган. 30 ноябрь куни Германия Бундестаги тегишли резолюция учун овоз берган.

«Голодомор оқибатида 20-асрнинг биринчи ярмида Европада миллионлаб одамлар ҳалок бўлди. Нафақат ғалла ҳудудлари, балки Украинадаги ҳамма очлик ва репрессиядан азият чекди. Бугунги кун нуқтаи назаридан бу геноцид сифатида баҳоланиши керак», дейилади Берлин баёнотида.

Ирландия, Руминия, Молдова, Чехия ва Германия парламентлари Голодоморни Украина халқининг геноциди сифатида тан олган. АҚШ Сенати 2018 йилда Украинадаги Голодоморни ҳам геноцид сифатида тан оладиган резолюцияни қўллаб-қувватлаган.

Голодомор геноцид сифатида

СССРда Сталин ҳукмронлиги даврида амалга оширилган қишлоқ хўжалигини мажбурий коллективлаштириш оқибатида 1932-33 йилларда мамлакатда оммавий очарчилик юзага келди, унинг қурбонлари миллионлаб одамларга етди. Украина бу фалокат Совет Иттифоқи раҳбарияти томонидан атайлаб қўзғатилганини таъкидлади.

Голодомор узоқ вақтдан бери Украина ва Россия ўртасидаги асосий баҳс мавзуси бўлиб келган. Москва Киевнинг йирик очарчилик қурбони фақат украиналиклар бўлган деган фикрини рад этиб, Марказий Осиё ва Россиядаги миллионлаб одамлар ҳам очарчиликдан жабр кўрганини илгари сурган. 2006 йилда Украина Олий Радаси Голодоморни Украина халқига қарши геноцид акти деб эълон қилган.