Украинанинг Россия билан зиддиятда мағлубиятга учраши глобал оқибатларга олиб келиши мумкин, шу жумладан Ғарб альянслари мустаҳкамлигига ҳам таъсир ўтказиши мумкин. Бу ҳақда АҚШ Миллий разведкаси директори Эврил Хейнс Давосдаги форумда сўзлаган нутқида айтиб ўтди.
«Украина муваффақият қозонмаган тақдирда, бу дунё учун қандай оқибатларга олиб келиши борасида айтилган барча нарсаларга қўшимча равишда яна бир қатор мулоҳазалар бор: Украинадаги низо глобал оқибатларга эгалиги ҳақидаги факт аниқ-равшандир», — деди у.
Хейнснинг сўзларига кўра, Украина мағлуб бўлган тақдрида, Ғарб иқтисодий оқибатларга ва мавжуд альянсларнинг мустаҳкамлиги борасидаги саволларга тўқнаш келади. «Келажакда амалдаги шахсларнинг қонун устуворлигини, БМТ уставини ва биз ўрнатган тартибни бузиши билан боғлиқ вазиятларни қандай ҳал қиламиз — шу масала ҳам қаршимизга чиқади», — деди Хейнс ва Украинани «максимал даражада кучли» қўллаб-қувватлашга чақирди.
Аввалроқ Украинадаги низо Россия мағлубияти билангина тугаши ҳақида Германия канцлери Олаф Шольц айтиб ўтганди. «Уруш тугаши учун Россия ютқазиши керак. Мана шунинг учун ҳам шериклар билан маслаҳатлашувлар ўтказган ҳолда Украинага доимий равишда кўп қурол-яроғ етказиб беряпмиз», — деди у.
18 январь куни Россия президенти Владимир Путин Украинадаги махсус операцияда Россия ғалаба қозониши муқаррар эканини айтди. У, шунингдек, Россия амалга ошираётган ишлар, шу жумладан, «махсус операция» ҳам, гўёки, урушга нуқта қўйишга уриниш эканини айтди. «Бугунги кунда қилаётган ҳар бир ишимиз, шу жумладан, махсус ҳарбий операция урушни тўхтатиш ва Донецк ҳамда Луганск ҳудудларида яшовчи халқимизни ҳимоя қилишга уринишдир. Бу бизнинг тарихий ҳудудларимиздир», — деди у.
Мавзуга доир:
Изоҳ (0)