Европарламент депутати НАТОни террорчи ташкилот деб атади

Европарламентнинг ирландиялик депутати Мик Уоллес НАТОни АҚШ ва ҳарбий-саноат комплекси манфаатларига хизмат қилувчи террорчи ташкилот деб атади.

“НАТО бегуноҳ инсонларнинг қонига ботган, АҚШ империяси ва ҳарбий-саноат комплекси манфаатларига хизмат қилувчи террорчи ташкилотдир”, деб ёзади Уоллес.

Аввалроқ Франция армиясининг собиқ аскари НАТОдаги француз аскарлари ўз ватанига эмас, АҚШ манфаатларига хизмат қилишини айтганди. Унинг таъкидлашича, Франция Қўшма Штатларнинг Кувайт, Югославия ва Африкадаги “ифлос ишлари”да иштирок этган.

9 июль куни Вашингтонда НАТО саммити бошланди, бу альянснинг амалдаги бош котиби Йенс Столтенберг учун охиргиси бўлади. 1 октябрда Столтенбергнинг ўрнига доимий вакиллар томонидан тасдиқланган Нидерландиянинг собиқ бош вазири Марк Рютте келиши кутилмоқда.

Саммит гўёки Россия ва Хитойдан келиб чиқаётгани айтилаётган таҳдидларга қарши туришга қаратилган. Унинг доирасида яқин йилларда альянснинг Украинадаги можарога кўпроқ жалб этилиши ва ҳарбий-сиёсий блокни мустаҳкамлаш билан боғлиқ қарорлар қабул қилиниши режалаштирилган.