Украина Олий Радаси “Россия Федерациясида мавжуд сиёсий режимни рашизм деб белгилаш ва унинг мафкуравий асослари, ижтимоий амалиётини тоталитар ва инсониятга қарши қаратилган, деб қоралаш тўғрисида”ги баёнот лойиҳасини рўйхатдан ўтказди, деб хабар бермоқда Meduza.
“Страна” нашрининг қайд этишича, лойиҳа муаллифлари орасида ҳукмрон “Халқ хизматкори” партияси депутатлари ҳам бор, шунинг учун ҳужжат қабул қилиниши эҳтимоли катта.
Тушунтириш хатида қарорнинг мантиқий асоси сифатида қуйидагилар айтилади:
“Россия Федерациясининг Украинага қарши шафқатсиз, асоссиз уруши бутун дунёга В.Путин сиёсий режимининг неоимпериал, ўтмишдаги энг ёмон амалиётларга тақлид қилувчи, рус фашизмининг замонавий варианти(рашизм)да фашизм ва миллий социализм ғояларини ўзида мужассам этган тоталитар диктатура сифатидаги асл моҳиятини очиб берди”.
Ушбу баёнот билан Олий Рада Владимир Путиннинг “рашизм режими”ни қоралайди ва халқаро ҳамжамиятни Россиянинг амалдаги сиёсий режимини жиноятчи деб тан олишга қўшилишга чақиради, дейилади ҳужжатда.
Баёнот лойиҳаси кўриб чиқиш учун парламент қўмитасига тақдим этилди. Қабул қилингандан сўнг баёнот матни Бирлашган Миллатлар ташкилоти, Европарламент, Европа Кенгаши парламент ассамблеяси, Европада хавфсизлик ва ҳамкорлик ташкилоти, НАТО парламент ассамблеяси ҳамда хорижий давлатлар ҳукуматлари ва парламентларига тақдим этилиши режалаштирилган.
Изоҳ (0)