Европарламент Россия олий раҳбариятини Украинага қарши босқинчилик жиноятлари учун жавобгарликка тортиш учун махсус трибунал ташкил этиш тўғрисидаги резолюцияни қабул қилди. Бу ҳақда Deutsche Welle хабар берди.
Европарламент депутатларининг 427 нафари ҳужжатни ёқлаб овоз берган, 19 нафари қарши чиққан, 33 нафари эса бетараф қолган.
«Европа Иттифоқи ва унинг аъзолари Украинага нисбатан Россиянинг сиёсий ҳамда ҳарбий раҳбарияти томонидан содир этган жиноятини таъқиб қилиш учун махсус халқаро трибунал яратишга интилиши керак. Махсус трибунал Украина ва халқаро ҳамжамият билан яқин ҳамкорликда, яхшиси БМТ орқали тузилиши керак», — дейилади Европарламент резолюциясида.
Бундай трибуналлар БМТ Хавфсизлик Кенгаши қарори билан собиқ Югославия ва Руандадаги уруш жиноятлари учун жавобгарликка тортиш мақсадида ташкил этилган.
Ташаббус муаллифларининг асосий вазифаси махсус трибунал яратилишининг қонуний асосли йўлини топиш бўлиб, асосий шарт эса суд Путинни, Россиянинг сиёсий ва ҳарбий раҳбариятини, шунингдек, Александр Лукашенкони жиноий жавобгарликка тортиш ваколатига эга бўлиши керак. Беларусь ҳудудидан фойдаланиб Россия Украинага қарши уруш олиб бораётгани таъкидланади.
Аввалроқ, Германия ташқи ишлар вазири Путинни қандай судлаш бўйича схема таклиф қилганди. Россия раҳбариятини Халқаро жиноят суди доирасида жавобгарликка тортишнинг иложи йўқ, чунки Россия бу суднинг юрисдиксиясини тан олмайди. БМТ Хавфсизлик Кенгаши Халқаро жиноий судга бундай ваколатларни бера олмайди, чунки Россиянинг ўзи бу резолюцияни вето ҳуқуқи билан блоклайди.
Мавзуга доир:
Изоҳ (0)