Европа Иттифоқи умумий бюджетининг ички ҳисоб-китобларига кўра, Украинанинг иттифоққа қўшилиши мамлакатга етти йил ичида тахминан 186 миллиард евро олиш ҳуқуқини беради. Бу ҳақда Тhе Financial Times хабар бермоқда.
Нашрнинг қайд этишича, жорий йилнинг ёзида ЕИ расмийлари иттифоққа янги аъзоларнинг қўшилишидан сўнг юзага келиши мумкин бўлган молиявий оқибатларни баҳоладилар. Улар иттифоқнинг 2021-2027 йиллар учун бюджет қоидаларидан фойдаланган ҳолда тадқиқот тайёрладилар. Расмийлар Европа Иттифоқига Украина, Молдова, Грузия ва ғарбий Болқоннинг олтита давлати киришини назарда тутган ҳолда ҳисоб-китоб қилди.
Барча тўққиз аъзонинг қўшилиши ЕИ бюджетига 256,8 миллиард еврога тушади. Нашрнинг ҳисоб-китобларига кўра, тўққизта янги аъзо давлат қўшилиши билан жорий бюджет 21 фоизга ошиб, 1,47 триллион еврони ташкил қилади. Бу 36 мамлакат ялпи миллий даромадининг тахминан 1,4 фоизини ташкил қилади.
Иттифоқнинг тўлиқ кенгайиши ўн йил ёки ундан кўпроқ вақтни олиши ва мавжуд фискал механизмларда катта ислоҳотларни талаб қилиши мумкин бўлса-да, кутилаётган ўзгаришлар кўлами блокдаги молиявий мувозанатни кескин ўзгартиради.
Эслатиб ўтамиз, кеча Европарламент 2021-2027 йилларга мўлжалланган Европа Иттифоқи бюджетини қайта кўриб чиқишни маъқуллагани, унда Украинанинг 50 миллиард евролик махсус жамғармасини шакллантириш қоидалари борлиги маълум бўлганди.
Изоҳ (0)