Европарламент бюджет ва ташқи ишлар қўмиталари реконструкция ва модернизация ишлари учун Украинага 50 миллиард евро ажратиш таклифини маъқуллаганини маълум қилди.
86 депутат молиявий ёрдамни қўллаб-қувватлади, 6 нафар депутат қарши чиқди, яна 2 нафар депутат бетараф қолди. Европарламент баёнотида “Европа Иттифоқи бюджетини узоқ муддатли кўриб чиқишга мувофиқ ёрдам пакетини зудлик билан қабул қилиш зарурлиги” ҳақида сўз боради.
Ёрдам пакети келгуси йилнинг йиллик бюджетига киритилади. Ушбу бюджет бўйича музокаралар ноябрь ойида бўлиб ўтади. Европалик депутатларнинг асосий талабларидан бири Украинани қайта тиклаш учун Россия активларидан фойдаланишдир.
“Украина учун таклиф этилаётган жамғарма Европа Иттифоқининг узоқ муддатли бюджетини қайта кўриб чиқишнинг бир қисми бўлиб, 2021 йилдан буён кўплаб инқирозлардан сўнг у жиддий равишда камайиб кетганлиги сабабли тузатишга муҳтож”, — дейилади резолюцияда.
Бундан ташқари, Европарламент аъзолари Украинадаги фирибгарлик, коррупция, манфаатлар тўқнашуви ва Европа Иттифоқи маблағларидан фойдаланишдаги қонунбузарликларга қарши курашни талаб қилишди. 16–19-октябрь кунлари бўлиб ўтадиган ялпи мажлисда Европа парламентининг тўлиқ таркиби лойиҳага овоз беришда қатнашади.
Изоҳ (0)