Европа Иттифоқига аъзо бўлишни кутаётган Молдова ва Украина мамлакатлари Европарламентга кузатувчи сифатида қўшилиши мумкин, деди Европарламент раҳбари Роберта Мецола Politico нашрига берган интервьюсида. Молдова ва Украинадан келган кузатувчилар овоз бериш ҳуқуқига эга бўлмайди.
“Агар бир мамлакат Европага сиёсий нуқтаи назардан қараса, Европа унга ўз эшикларини кенг очиши керак”, — дейди Мецола.
Бу ғояни амалга ошириш учун иттифоқ парламентдаги сиёсий гуруҳлардан ёрдам олиши, шунингдек, Европа Иттифоқининг бошқа номзодларига ҳам худди шундай имкониятни тақдим этиши керак бўлади.
“Кенгайиш ҳар доим Европа Иттифоқининг энг кучли геосиёсий воситаси бўлиб келган”, — дея қўшимча қилди Мецола.
Украина ва Молдова 2022 йил июнь ойида Европа Иттифоқига кириш учун номзод мақомини олганди. 2023 йил октябрь ойида Европа Кенгаши президенти Шарл Мишел Украина ва бошқа номзод давлатлар “уй вазифаларини” бажариш шарти билан 2030 йилгача Европа Иттифоқига аъзо бўлишлари мумкинлигини айтди.
Изоҳ (0)