Исроил мудофаа вазири Йоав Галант мамлакат қуролли кучлари Ливаннинг “Ҳизбуллоҳ” гуруҳига қарши ҳаракатларини тўхтатмасликка ваъда берди, деб хабар берди The Times of Israel нашри.
“Ҳасан Насруллоҳни йўқ қилиш жуда муҳим эди, аммо охирги қадам эмас”, дея нашр Галантнинг аскарларга мурожаатидан иқтибос келтиради.
“Биз сиз ҳар қандай вазифани бажаришга қодир эканлигингизга ишонамиз”, дея қўшимча қилди мудофаа вазири.
Исроил икки ҳафтадан бери Ливан жанубида фаол ҳаво ҳужумлари уюштириб, “Ҳизбуллоҳ” ҳаракати инфратузилмасини вайрон қилмоқда. Жума куни Исроил ҳаво кучлари “Ҳизбуллоҳ”нинг марказий қароргоҳи жойлашган Байрутнинг жанубий чеккасига кучли ҳаво ҳужуми уюштирди. Ушбу зарба натижасида ҳаракат етакчиси Ҳасан Насруллоҳ ва бошқа қўмондонлар ҳалок бўлди.
Бундан ташқари, Исроил ҳужуми оқибатида ҲАМАС ҳаракатининг Ливандаги раҳбари Фатҳ Шариф Абу ал-Амин ҳалок бўлгани хабар берилди.
Изоҳ (0)